Parliament-ah Amit Shah-a'n Nagaland chungchang sawi

Nagaland-a security force-te pawikhawihna thlen dan hi nimin zing khan prime minister Narendra Modi chuan senior minister-te a sawipui. Hemi hnu nimin chawhnu khan union home minister Amit Shah chuan Parliament-ah Nagaland chungchang hi a sawi ve leh a ni.

Amit Shah chuan Nagaland-a thil thleng chungchangah nimin chawhnu dar 3 khan Lok Sabha-ah thu a sawi a, a hnuah Rajya Sabha-ah a sawi leh bawk.

Nimina Parliament inkhawmah hian eptute chuan Nagaland-a sipaite chet dan hi sawichhuakin, pawisawi lo civil mite kahhlum an ni chu an dem thu an sawi nasa hle. Lok Sabha-ah MP Manish Tewari chuan thil thlen dan hi High Court judge ṭang lai chhuitir a phut. Hei bakah pawikhawihtute humhim an nih lohna turin sawisel hlawh tak, AFPSA chu hmang lo turin a phut bawk. Eptu MP-te chuan civil mi, ralthuam pawh nei lote hel anga sipaiten an ngai thei leh, hemi chungchanga intelligence agency-ten thu dik tawk lo an hrilh dan chu sawichian an phut. Eptute hian Amit Shah chauh ni loin, prime minister Narendra Modi leh defence minister Rajnath Singh-te chu Parliament-ah Nagaland-a thil thleng chungchang sawifiah tur hian an phut bawk a ni.

Amit Shah chuan Nagaland-a thil thleng chu sorkar chuan pawi a ti tak zet a, civil mi thi chhungte a tawrhpui thu a sawi. Thil awmdan dik tak hrechiang tur leh, hetiang thil tihsual hi a thlen nawn tawh lohna turin Ministry of Home Affairs (MHA) chuan Nagaland-a additional secretary level officer a tirh nghal thu a sawi. Agency zawng zawngte chu hetianga tihsual hi a thlen tawh lohna tura a ṭul anga hma la tura tih a ni tiin, sorkar chuan thil awmdan pawh uluk takin a thlithlai reng dawn a ni, a ti.

Home Minister chuan information an dawn bawhzuiin, sipai commando 21-te chuan Mon district-ah helho an lo chang a, motor rawn tlan hi ding tura an ti chu a din loh avangin helho an phur nia ngaiin an kap zui ta a ni, a ti. Hriatsual vang liau liau a ni tiin, thil thlen dan chhui tura din SIT chu thla khat chhung ngeia chhui fel tura tih a nih thu a sawi bawk.

Sipaite thiltih an hriat hnuah a chhehvel khaw mipuite chuan Army unit hualin an bei a, sipai motor pahnih an halsak bawk tih Shah chuan a sawi. Sipaite hian invenna atan leh mipuite hnawhdarh nan silaia kapin, civil mi pasarih an thih belh leh a ni, a ti. Sipai pakhat a thi bawk a, sipai zingah hliam tuar eng eng emaw zat an awm a ni, tiin a sawi.

Amit Shah chuan December 5, Pathianni tlai khan Mon khawpuia Assam Rifles-te company operating base (COB) chu mi 250 vel pungkhawmin an bei leh a, COB building hi an hal zui a, Assam Rifles sipaiten mipui hnawhdarhna atana silai an hmehpuahah civil mi pakhat a thih belh leh tih a sawi bawk.

Buaina nasa zawk a chhuah venthawn thilah, Mon district-ah hian sipai dah luh belh an ni tawh a, Army II Corps Headquarters pawhin pawisawi lo civil mite thihna thleng avang hian pawi an tih thu thuchhuah an siam tawh bawk a ni, tiin Shah chuan a sawi.