India chuan nimin khan ramchhungah Covid vaccine dose tluklehdingawn khat a semchhuak tling ta. China dawta hetiang zat semchhuak thei hmasa ber a ni. Kumin January 16 aṭanga vaccine semchhuah bul ṭan a nih aṭanga ni 287 hnuah mellung pawimawh tak hi a siam thei ta a ni.

Nimin thleng khan mipui vaibelchhe 70 chuangin Covid-19 vaccine dose khatna an la tawh a, vbc 29 chuangin dose hnihna an la tawh a ni. Prime minister Narendra Modi kaihhruai sorkar chuan India rama puitling vaibelchhe 94 vel hnenah December ral hmain Covid vaccine pekchhuah hman vek a tum.

January 16 khan vaccine sem chhuah ṭan niin a tahtawla kalpui a ni a, health worker aṭangin bul ṭan a ni. February 2-ah frontline worker - paramilitary force, police, civic worker-te hnenah pekchhuah leh a ni. February 28-ah khan dose vaibelchhe 1.4 chuang semchhuah a ni.

Huamzau zawka semchhuak zelin, March thla khan mipui kum 60 chin chunglam leh kum 45 chunglam natna benvawn neite hnenah pekchhuah leh a ni. Prime minister Narendra Modi chu an zinga dawng hmasa ber niin, vaccine hi Delhi-a AIIMS-ah a la. A thla leh aṭang hian sorkar laipui chuan kum 45 chunglam tan vaccine hi a semchhuak leh ṭan a ni.

Vaccine semchhuah hna kalpui karah Covid-19 hri leng thawh hnihna chu ram chhungah a inṭan chho a, nikhata hri kai hmuhchhuah thar nuai li chuang an awm changte awmin, hri leng thawh khatna ai khan nikhata thihpui zat pawh an tam zawk a ni.

Ramchhunga vaccine indaih lohna lian awm chhoh avangin India chuan ramdanga vaccine a thawnchhuah hna 'vaccine maitri' programme chu April khan a titawp zui a ni. April 30 khan India ramah a vawikhatna atan Covid kai thar mi nuai li chuang an awm a, hetihrual hian vaccine dose vbc 15 chuang a semchhuak tawh thung.

May 1 aṭangin puitling, kum 18-44 tan vaccine hi semchhuak ṭan lehin state tam takah erawh vaccine indaih lohna hi a lian hle. May 13 khan sorkar laipui chuan a thuchhuah siamte rawn her danglamin, Covishield dose an lak aṭanga ni 28 hnu emaw kar ruk-riat inkar emawa lak tura an tih a chu result ṭha zawk a neih theih beiseiin kar 12-16 inkarah an rawn sawn hla a ni.

June 7 khan sorkar laipui chuan a hmaa state kuta awm ṭhin chu an mahni koah dahin vaccine semchhuah hna an kalpui a, June 21 aṭangin mitin hnenah a thlawnin vaccine an semchhuak ṭan a ni. May 25 khan dose vbc 20 chuang semchhuak tlingin, vbc 10 aṭanga vbc 20 tlin tur hian ni 29 chhung hun an hmang a, June 23 khan vbc 30 a tling chho leh a ni. August 7 zing khan India rama Covid-19 vaccine semchhuah chu dose vbc 50 chuang a tling a, dose vbc 20 dang semchhuak leh turin ni 44 chiah an mamawh a ni.

Data aṭanga a lan danin, September thla kha India rama vaccine semchhuah tam ber thla a ni. PM Modi piancham, September 17 khan sorkar chuan record siam tumin hma a la a, hemi ni hian dose vbc 2.5 semchhuah niin, nikhat thil thua semchhuah tam ber ṭum a ni.

Thla hmasa khan dose vbc 23 chuang semchhuah leh niin, vbc 80 thleng leh turin ni 11 chiah hun an hmang.

Thla hnih liamta chhung khan thil chhinchhiah thlak tak a thleng bawk a, Himachal Pradesh chu August thla khan ramchhung state zinga puitling hnena Covid-19 vaccine dose khatna pe kim thei hmasa ber a ni a, September 10 khan Goa chuan rawn chhunzawm ve lehin puitling zawng zawngte hnenah dose khatna an pe kim tawh tih a puang.

Prime minister Narendra Modi chuan India-in mellung pawimawh tak a siam lawmna pualin Delhi-a RML hospital a tlawh a, ram mipuite lawmpuina hlanin, "Hei hi Indian science, enterprise leh ram mipuite zawng zawng hlawhtlinna a ni," a ti. Ramchhunga doctor, nurse leh Covid-19 frontline worker zawng zawngte chungah lawmthu a sawi bawk. PM hi union health minister Mansuk Mandaviya-a'na a ṭawiawm a ni.

Sorkar chuan rel, thlawhtheihna leh lawngah-te loudspeaker hmangin record ropui tak siam a nih thu hi a puang dawn a, India flag lian ber, kg 1,400-a rit chu Red Fort-ah zar a ni bawk ang. A lawmna pual hian Health Minister chuan audio-visual film siam a tlangzarh bawk. Kar liam ta Inrinni khan sorkar chuan vaccination anthem hi a lo tlangzarh tawh a, Padma Shri awardee Kailash Kher-a'n a hla hi a sa a ni.