Covid-19 do hna thawktu health worker-te insurance scheme pawt sei

Sorkar laipui chuan Covid-19 dona kawnga thawktu, healthcare worker-te tana insurance scheme a siam chu ni 180 dang a pawtsei.

Pradhan Mantri Garib Kalyan Package (PMGKP): Insurance Scheme for Health Care Workers Fighting COVID-19 hi October 20 thleng huam tura tih kha a ni a, mahse hri leng hi a la reh loh avang leh, hmun hrang hranga Covid kaihhnawiha duty health worker thi report a la awm zel avangin ni 180 dang scheme hi hman chhunzawm turin pawhsei a nih thu union health ministry chuan a sawi. Covid vanga thi, health worker 1,351 chhungte hnenah he scheme hnuaiah zangnadawmna pek an ni tawh tih a sawi bawk.

Healthcare worker-te insurance scheme hi nikum March 30 khan hawn niin, Covid-19 hri kaite enkawl leh an duty-na atanga hri kai leh chhiatna dang tawka thi, healthcare worker-te chu zangnadawmna cheng nuai 50 pek tura tih a ni.