India Republic Day vawi 72-na chu nimin, January 26 khan ram pumah lawm a ni.
Hripui leng vangin kum dang anga puiin lawm theih a ni lo a, a lawmna pui ber Delhi-a neihah chuan khuallian awm loin hman a ni. Parade neihna hmun pawh tihtawi niin, mipui chhim theih zat pawh kum dang ngaihtuah chuan an tlem hle.
Republic Day lawmna bul ṭanna atan prime minister Narendra Modi chuan National War Memorial-ah ram tana nunna hlantu sipaite zahna pangpar a dah. He hun hi defence minister Rajnath Singh, chief of defence staff (CDS) General Bipin Rawat, Indian Army chief Gen MM Naravane, Indian Navy chief Admiral Karambir Singh leh Indian Air Force (IAF) chief Air Chief Marshal RKS Bhadauria-ten an hmanpui.
President Ram Nath Kovind chuan hnam puanzar pawtpharhin, Rajpath-a parade a lo chhang a ni. Kumina Republic Day lawmnaah hian a ṭum khatna atan Republic Day flypast-ah Rafale fighter jet-te an inlan a, flypast-ah hian Air Force thlawhtheihna 39 leh Army aircraft pali an tel a,Indian hmeichhe zinga fighter pilot hmasa ber Flight lieutenant Bhawan Kanth pawh a vawi khatna atan a tel ve. Captain Preetin Choudhary chu hmeichhe army officer zingah kumina contigent kaihruaitu awmchhun a ni bawk.
State leh union territory 17 bakah, union ministry leh paramilitary force aṭangin tableau 32 pho lan a ni, India ram culture hausakna, economy lama hmasawnna leh defence lama hmasawnna hrang hrangte an pho lang a ni.
Armed force-ten ralthuam an pho lan zingah third-generation Russian T-90 battle tank, T-72 bridge-layer tank, BMP-2 armoured personnel carrier, Pinaka multi-barrel rocket launcher, leh BrahMos te an tel.
