Tractor rally neite leh police-te innawr buai

Loneitute chuan a hmaa an lo tum lawk angin nimin khan sorkar laipuiin farm law pathum a siam thar duh lohna lantirin Delhi-ah tractor rally an huaihawt ve nghal a, rally huaihawtte leh Delhi police-te chu hmun eng emaw zatah an innawr buai. 

Tractor rally neih tur hi a hma aṭangin sorkar laipui chuan a helh tawh a, Supreme Court hnenah pawh dansak turin a ngen hial a ni. Mahse court chuan dan leh thupek kaihhnawih thil a nih avangin Delhi Police-te kutah a dah a ni. Police-te leh loneitute an inbiak hnuah, police-te chuan rally hi neih phalsakin, an tlanna tur kawng bik a thlansak a, hei bakah hian Rajpath-a Republic Day parade zawh hnuah nei ṭan turin an ti a ni. 

Mahse nimin khan Singhu leh Tikri border-a loneitute chuan hun tiam hma hian Delhi khawpui hi an pan a, police-ten kawnga daidanna an siamte an tichhia a, hun eng emaw zatah police-te nen an innawr buai zui a ni. Police-te chuan Rajpath lam pan tum loneitute chu tear gas-ten an phuh. 

Police-te chuan loneitute chu an tlanna tur kawng bik siamah tlan tura ngen an ni chungin ṭhenkhat chuan an thu hi an ngaichang duh lo a, lungin police-te chu an tawng zui a, police zingah pawh hliam tuar eng emaw zat anawm niin an sawi. 

Nimin chawhnu lam khan loneitute hian Republic Day parade neihna, Red Fort complex an lut a, nawrh an huaihawt tirh lama awmkhawmna tura an lo ruahman Ramlila Maidan-ah an kalkhawm a ni. He hmun hi chhuahsan an tum tawh lo tih sawi mah se, Delhi police-te nena an inbiak hnuah chhuahsan turin an inbe fel leh thei a ni. 

Buaina chhuak vang hian Delhi Metro Rail Corporation chuan nimin atan metro station hrang hrangah entry leh exit gate-te a khar nghal. Khawpui chhunga kawngpui pawimawh eng emaw zat pawh khar a nih avangin traffic pawh a buai phah hle. Guragon aṭanga Delhi luhna tur point pahnih chu khar nghal a ni a, Ghazipur border aṭanga east Delhi panna kawngte chu khar an ni bawk. 

Nawrh huaihawt mek, lonei­tute hian February 1-ah Parliament pana kea kawng zawh huaihawt leh an tum. February 1 hian Parliament-ah budget pharh a ni dawn a, hemi ni hian loneitute hian farm law thar pathumte sut tura sorkar phut nan kawng zawh hi an tum a ni. 

Delhi khawpui chhunga lonei­tute leh Delhi police-te inkara innawrbuaina a thlen hnua, Cong­ress hruaitu Rahul Gandhi chuan tharum thawhna thleng chu pawi a tih thu a sawi. Gandhi chuan tharum chu buaina chinfelna tur a ni lo tih sawiin, a eng lam lam pawhin hliam leh harsatna tawk se, India ram chu a chantu a ni zel a ni, a ti. Ram tana ṭha tur ngaihtuah a, farm law thar siamte chu sut turin sorkar laipui a phut nghal bawk. 

Punjab chief minister Amarin­der Singh pawhin PM Modi hnenah loneitute thil phut chu pawmsak a, farm law pathum chu sut leh turin a ngen. Singh chuan heng farm law siam tharte hi a dik lo hulhual a ni tiin, loneitu kum upa tak tak tawhte chu Delhi border-ah hun rei tawk nawrh huaihawtin an awm tawh a, heng mite hian an tan ni loin, an fate leh a thlah zel turte tan zawk an bei a ni, tiin a sawi.