Kerala state-a ruahsur nasa avanga tuilian leh leiminin chhiatna a thlena thi chu mi 37 an tling tawh.
Official-te chuan an state chuan tuilian nasa tak an tuar mek tih sawiin, district awm zat 14 zing a zahve aia tamah mipuite chu fimkhur tura hriattir an ni.
Ruahsur nasa leh leimin vang hian mi tam tak chu hmun him lamah sawnchhuah an ni tawh a, mi 60,000 chuang chu relief camp hrang hrangah dah an nih thu Kerala State Disaster Management Authority(KSDMA) control room chuan a tarlang. Tuilian hian thlai chinna ram acre 2547.66-a zau pawh a chim chhe tawh bawk.
State chhunga lui 44-te chuan ruahsur nasa avang hian an lian a, kum 1924 hnua Kerala in tuilian a tawrh nasat ber a la ni. Ni thum kalta chhungin ruahsur vang hian hmun 25-ah leimin nasa tak a thleng a, heng zinga 21 hi Idduki biala thleng a ni.
Tuilian vangin chenna in 1,501 chu a chhe tawh a, heng zingah 101 chu luah zui tlak lohin a chhe vek a ni. Chief Minister Pinarayi Vijayan chuan ruahsurin chhiatna a thlen vang a thi te chhungte hnenah ralna cheng nuai li ṭheuh pek a nih tur thu a puang a, luah zui tlak loa in chhiate chu zangnadawmna cheng nuai 10 pek an ni dawn bawk tih a sawi.
Union Home Minister Rajnath Singh leh CM Vijayan te chuan Inrinni khan thlawhtheihna hmagin Idduki leh Wayanad-a tuilenna hmunte an enkual a ni.
Kozhikode, Idduki, Malappuram, Kannur leh Wayanad-a tuilian tuarte chhanchhuah leh chhawmdawl hna chu Army colum 10 in an thawk mek a, Navy, Air Force leh NDRF ten an pui bawk. Mahse ruah a sur chhunzawm reng avangin chhanchhuah hna hi an thawk chak thei lo a ni. Hmun tam tak chu leiminin kawngpui a hnawh avangin kalpawh theih lohin a awm mek bawk.
