Brajesh Thakur kut aṭangin mobile phone man

Bihar-a Muzaffarpur shelter home-a hmeichhe naupang 34 pawngsual nia sawi chungchanga mawhphurtu bera puh, Brajesh Thakur chu Muzaffarpur Central Jail-ah tantir a ni tawh. Jail-a tanna enfiah a nihnaa Thakur-a kut aṭang hian mobile phone bakah sim card hman lai hmuh a ni.

Phone hmuhchhuah aṭang hian Brajest-an jail a tan hnu pawha a la biak pawh ṭhin, phone number 40 hmuh a ni. Central Bureau of Investigation (CBI) chuan heng phone number-te leh a sim card hman hi an chhui chiang dawn a ni.

Bihar police-te chuan Inrinni khan state chhunga jail hrang hrangte an dap a, mobile phone 12, charger pali, pendrive pahnih leh sim card eng emaw zat an hmuchhuak a ni.

Shelter home-a hmeichhe naupangte pawngsualna thlenga mawhphurtua puh, Thakhur hi June 2 khan man ni mah se a hriselna a ṭha tawk lo nia chhuanlam a siam avangin medical ward-ah dah reng a ni a, Muzaffarpur Central Jail-ah hian ni nga chauh a la awm a ni.

Brajesh Thakur-a fapa, Rahul Anand pawh Inrinni khan thu zawhfiah a nih hnuah chhuah a ni. Anand hi Hindi nitin chanchinbu "Pratah Kamal" editor leh publisher a ni, a office hi shelter home awmna compound chhungah awm a ni. Mahse he home hi pawikhawihna thleng report a awm avang hian kharsak an ni tawh.

CBI team chuan Muzaffarpur shelter home hi a hmuna kalin an enfiah tawh a, forensic expert-te pawh hruai an ni. An thil chhuina atana pawimawh tur document leh thil dangte an la nia sawi a ni.