China sorkar chuan an rama tertiary level hospital zawng zawng chu kumin kumtawpah nu, nau nei turte tan na chhawkna, epidural anaesthesia hman theihna tur service nei vek tawh turin a ti.

Tertiary hospital hi khum 500 chin awmna a ni a, heng hospital-te kuminah epidural anaesthesia service nei vek tura tih niin; khum 100 chin awmna secondary hospital-te pawh kum 2027-ah he service hi nei vek tura tih an nih thu National Health Commission (NHC) chuan a sawi.

China ramah hian nau nei zinga 30% vel chauhin na chhawkna tur anaethesia hi an dawng a, hetih lai hian developed country-ah chuan 70% vel in an dawng ṭhin thung. World Health Organisation chuan nu nau nei tur, hrisel ṭha pangngai chuan an nau neih dawnah a na chhawkna tura epidural tih sak turin a ti a ni. Ram tam takah hman a ni tawh a, France-ah chuan nau nei tur zinga 82% chuan na chhawkna pek hi an duh a, US leh Canada-ah 67% chuangin an duh bawk.

Kum thum chhung chu a zawnin China-ah hian nau piang an tlahniam tawh a, mithiamte chuan an la tlahniam zel dawn nia a lan thu an sawi. Nau piang an tlakhniam zel chuan an ram economy thlengin a nghawng thei dawn a, hei vang hian thuneitu lam pawhin nau piang an pun theihna turin hma an la chho mek a ni. Province eng emaw zatah chuan nau nei turin anaesthesia a hmanna senso pawh hi medical insurance scheme-ah an telh tawh.