Iran-in khawpui dangah ui kaih chhuah khap belh

Iran chuan vantlang hriselna leh himna tur tia Tehran khawpuia ui kaih chhuah khapna a siam chu Pathianni khan khawpui hrang hrangah a siam belh. Khawpui lian 17-ah chuan ui kaih chhuah hi khap a ni tawh.

Iran khawpui, Tehran-ah hian kum 2019 khan police-ten pawn lama ui kaih chhuah hi an khap a, motor-a phurh chhuah pawh khap a ni bawk. Hetih lai hian ui vulh erawh khap a ni lo thung. Pathianni aṭang khan khawpui dangah khapna hi hman thar a ni leh ta a ni.

1979 Islamic Revolution aṭang khan Iran thuneitute chuan ui hi thianghlim lo leh, khawthlang ram culture nghawng niin an ngai. Pawn lama kaih chhuah chu mipui hriselna, boruak muanawm leh hahdam tak ti chhe thei niin an sawi a, politician ṭhenkhat chuan ui vulh chu Muslim sakhaw mil lo niah an ngai bawk. Kum 2021 ah khan lawmaker 75 chuan ui vulh chu khawtlanga harsatna siam t hei, Iran leh Islam kalphung thlak danglam thei niin an sawisel a ni.

Iran Ministry of Culture and Islamic Guidance chuan ran vulh emaw, ran vulh kaihhnawih lam fakna tih chhuah chu kum 2010-ah a khap a, 2014 khan Parliament-ah ui kai chhuak ṭhinte hrem leh pawisa chawitir turin nawr a nia ,mahse bill hi pass a ni ta lo thung.