US sorkar chuan February 3, 2025 aṭangin Mexico, Canada leh China aṭanga bungrua lak luhah chhiah lakna thar a siam chu a hmang ṭan dawn.

President Donald Trump chuan kar liam ta Inrinni khan heng ram pathum aṭanga chhiah lakna tur, Canada leh Mexico aṭanga bungrua lak luha 25% chhiah lakna tur leh, China aṭanga bungrua lak luha 10% lakna tur thupek pathum chu a hran ṭheuhin a ziak a ni. Canada aṭanga oil, natural gas leh electricity lak luhah erawh chhiah hi 10% lak a ni thung ang.

Trump chuan chhiah tih san hi America mite venhimna turin a ṭul a ni a ti a, US-ah ruihhlo fentanyl tawlh luh leh document nei lo, dan loa pem lut ṭhinte dan chah an nih hma chuan he dan thar hi hman a nih tur thu a sawi.

Ram pathumte hian US sorkar ruahmanna thar siam hi na taka sawiselin, chhan let ngei pawh an tum tih an sawi. Mexico president Claudia Sheinbaum chuan US aṭanga bungrua lak luhah chhiah tih sanna tur thupek a ti chhuak ve nghal a, Canada prime minister Justin Trudeau pawhin US aṭanga bungrua lak luhah chhiah 25% an la ve dawn tih a sawi bawk. China pawhin an chhang let ve ngei dawn tih sawiin, US-in chhiah a lak sak zat, 10% chu China-a US bungrua thawn luhah lak ve a tum thu a sawi a ni. Hei bakah World Trade Organisation-ah complaint thehluh a tum tih sawiin, US-in chhiah lakna thar a siam thar chu WTO kaihhruaina dan bawhchhiatna a ni, a ti.