US sipaiten Somalia-a IS firfiak bei

United States sipaite chuan kar liam ta khan Somalia rama Islamic State firfiak pawl lakah beihpui an thlak.

US president Donald Trump chuan sipaite hi beihpui thlak turin thu a pe tih Truth Social-ah a sawi a, firfiakte chu zawng chhuakin an tihlum zel dawn tih a sawi zui bawk. He beihpui thlak hi Somalia sorkar pawhin a hriatpui a ni.

Defence secretary Pete Hegseth chuan beihpui thlaknaah hian Somalia-a IS hmun, Golis tlanga mi chu an bitum tih an sawi a, beihpui thlaknaah hian civil mi hliam leh thi an awm lo a, firfiak pawl mi leh sa erawh eng emaw zat an thi nia hriat a nih thu a tarlang.

Somalia president Hassan Sheikh Mohamud office pawhin US sipaite beihpui thlak chungchang hi X-ah tarlangin, hei hian firfiakte bei tura ram pahnih sipaite thawhdunna chak tak a siam thar leh niin a sawi. Firfiakte nuaibo turin ram dangte an thawhpui zel tur thu a sawi bawk.

Somalia rama IS firfiak pawl hi kum 2015-a al-Shabab aṭanga indin an ni a, Galgala tlangdungah inkhuarin, training camp te an nei a, Abdulkardi Mumin-a'n a kaihhruai a ni.