China Parliament chuan an ram president ni lai, Xi Jinping chu President term thumna chelh turin a thlang a, kum nga dang President hna hi a chelh leh dawn a ni.

National People's Congress (NPC)-a member 2,952-te chuan an ram danpuia President term hnih chauh chelh theih tura dan a lo siam chu siamṭhat a nih hnuah, Xi hi term thumna chelh chhunzawm turin lungrual takin an pawm a ni.

NPC member-te hi rorellai, Communist Party ruat vek an ni a, nimina vote an thlakah Xi duh loh lama vote tla a awm lo. Vote thlak dawn hian candidate list semchhuah a awm lo a, a post chuhpuitu dang an awm lo nia rin a ni. Xi hi a term thumna turin China Central Military Commission chairman atan thlan a ni bawk.

Parliament chuan Parliament chair atan Zhao Leiji leh, vice president atan Han Zheng an thlang bawk. An pahnih hian President Xi term hmasaa Politburo Standing Committee member an ni.

Kum 69 mi, Xi Jinping hi nikum October thla khan Communist Party general secretary term thumna atan thlan a lo ni tawh a, Mao Zedong hnua China ram hruaitu thiltithei ber a ni chho mek a ni. Kum 2018 khan Xi hian a thuneihna tihngheh zualna atan President term hnih chin chelh theihna dan chu ṭhiatin, term bithliah awm a tibo tawh bawk. Sorkara chanvo pawimawh chelh turte ama ruat vek an nih avangin, President dinhmun pawh hi rei tak a la chelh chhunzawm zel rin a ni.

President Xi hian ni hnih chhungin a cabinet turte a ruat fel dawn a; China No 2 post, premier atan Li Qiang chu a dah leh rin a ni bawk.