U.S. president Joe Biden leh Russia president Vladimir Putin te chuan Ningani khan phone kaltlangin Ukraine rama buaina sosang chho mek chungchang an sawi dun.

President Biden hian Russia chu Ukraine nen an inkar siamṭha tura chahin, United States leh a thawhpuite chuan Russia-in Ukraine ram a chawkbuai chhunzawm zel a nih chuan hma an lak ve tur thu a hrilh tih White House Press Secretary Jen Psaki chuan thuchhuah a siamah a tarlang.

Biden hian ram pahnih inkara inpalai tawnna chu a thlawp thu sawiin, kumthar aṭang chuan NATO kaltlangin NATO-Russia Council-ah Strategic Stability Dialogue leh, Europe-a Organization for Security and Cooperation kaltlangin thawhhona ṭha tak an siam theih a in beisei thu a sawi bawk. Hemi rual hian Biden chuan boruak muanawm hnuaiah chauh inremna hi siam theih a nih thu a sawi a ni.

Biden leh Putin te hi December thla chhunga inbiakna an neih vawi hnihna a ni. December 7 khan ram pahnihte'n thawhdunna ṭha zawk an siam thar leh theihnan video conference hmangin inbiakna hi an lo nei tawh bawk.