SAfrica-in hri leng vanga zan curfew puan a titawp

South Africa ram chuan Omicron variant vanga an rama hri kai pung chak lutuk avanga zan lama curfew a puan chu a titawp.

Sorkar chuan Omicron vanga an rama Covid-19 hri leng thawh li-na thleng chu a vanglai a pel tawh nia an ngaih thu an thuchhuahah an tarlang. Hei vang hian zan dar 12 aṭanga a tuk zing dar 4 thlenga curfew a puan chu a titawp a ni.

Ram chhunga hri leng dinhmunte, vaccine pek chhuah dante leh healthcare sector hnuaia hmun hrang hrang indaihzai dante an thlir hnuin cabinet meeting-ah he thutlukna hi siam a ni tih minister Mondli Gungubele chuan a sawi.

Health department data-a lan danin, kar liam ta chhunga hri kai thar kha a kar hmasa aiin 27% in an tlem zawk a ni.

South Africa-ah hian hri kai hmuh chhuah hi maktaduai 3.5 an awm tawh a, an zinga 91,00-in a thihpui tawh a ni. Africa ram zinga hri kai tamna leh thihpui tamna ber ram an ni.

Zan lam curfew tihtawp a nih bakah, punkhawmna hmuna awm thei zat pawh thlahduh chhoin, inchhunga awm khawm thei chin chu 1,000 leh pawnlama awmkhawm thei chin chu 2,000 aia tam loah a bithliah bawk a ni.