Khawvel pumah Pathianni thleng khan Covid-19 kai hmuhchhuah mi maktaduai 250 dawn an awm tawh. Hri inkaichhawn awlsam tak, Delta variant darh pawh a ziaawm chho leh nia sawi a ni a, hei vang hian nunphung pawh a pangngai chho zel a, tourism pawh dan pangai anga kalpui leh ṭan mek a ni. Hetih lai hian Europe khawchhak ram ṭhenkhatte chuan hri kai thar tam lamah record an la siam zel thung.
Thla thum liamta chhung khan nitina hri kai thar zat hi 36% in a tlahniam tih zirchianna chuan a tarlang.
Hri inkaichhawn hi tlahniam mah se Delta variant darh nasat avangin ni 90 chhungin mi mtd 50 chuangin hri an kai thar hman. Covid-19 hmuhchhuah aṭanga kum khat dawna hri kai hi maktduai 50 an tling hman a ni.
Health lama mithiamte chuan vaccine an pekchhuah ṭhat avangin ram tam takte chuan an hun thim ber lai an kalsan tawh tih sawiin, hemirual hian thlasik khawvawt inṭan tur leh hunpui chhunga mipui punkhawmnate hian hri kai an pun belh phah thei tih an sawi.
Ram 240 zinga ram 55-ahte chuan hri kai thar an pung zel a, Russia, Ukraine leh Greece te hian kum hnih dawn liamtaa hripui len hnua hri kai tam lai ber ang kha an hmachhawn leh mek.
Europe khawchhak ramte hi region-a vaccine lak ṭhatlohna hmun te an ni. Khawvel puma hri kai thar aṭanga a zahve chuangte chu Europe ram aṭanga hmuhchhuah tharte an ni a, ni li chhunga hri kai thar mi mtd khat awm ang zela chhut a ni.
Khawvel mipui zinga a zahve aia tamin Covid-19 vaccine dose khatna pawh an la la lo tih Our World in Data chuan a tarlang. Ram rethei hoah chuan vaccine dose khatna la hi 5% pawh an la tling lo hlawm.
World Health Organization (WHO) leh aid group dangte'n thla hmasa khan ram hausa zual 20-te hnenah ram rethei zawkte tan thla 12 chhunga Covid-19 vaccine, test leh damdawi semchhuahna atan USD tluklehdingawn 23.4 pe chhuak turin an lo ngen tawh a ni.
