Thla 20 hnuah US-in vaccine dose kima la tan ramri hawng dawn

United States chuan nimin khan ramdang aṭanga khualzin, vaccine dose bikima la tawh te tan an ram inrina an hawng ṭan dawn tih sawiin, thla 20 chhung inkharkhip an lo kalpui tawh chu an hlip dawn ta a ni.

He khuahkhirhna dan hi President hlui Donald Trump khan Covid-19 hri leng vanga a siam a ni. He dan siam hian ram 30 chuang a nghawng a, an zingah hian UK leh EU ram te pawh an tel. Ramri khar vangin chhungkaw tam tak ṭhendarhin an awm a, tourism lam pawh a nghawng nasa hman hle.

Vaccine dose kima la tawhte tana khuahkhirhna thlahdul a nih avangin Airlines-te chu an lun chho leh tura ngaih a ni.

Paris-a travel agency Jetset Voyages hotu Jerome Thomann chuan thu lawmawm tak a ni tih sawiin, booking ti ṭhahnem tak an awm belh phah nghal a ni, a ti.

Coronavirus hri leng khuahkhirh turin kum 2020 kumtir lam khan US chuan China aṭanga khualzin luhte a khap a, hemi hnu hian khuahkhirhna hi ram dang huam belh tir zel an ni. UK leh European ram te bakah, China, India, South Africa, Iran leh Brazil te a huam chho a ni.

Dan thar hnuaiah hian rampawn aṭanga khualzin lutte hian an thlawh chhuah hmain vaccine an la tawh tih finfiahna an hmuh a ngai dawn a, an zin aṭanga ni thum chhungin Covid-19 negative test result an neih a ngaih bakah an contact information kimchang an pek a ngai dawn bawk. US an luh hnuah inkhung hran erawh a ngai dawn lo thung.