World Health Organisation (WHO) chuan khawvel pumah Covid-19 vangin healthcare worker 80,000 aṭanga 1,80,000 an thi tih sawiin, khawvel hri darh zel chuan chauhna, rilru tawt leh taksa lama nguaina a thlen zel hlauhthawnna a lian hle tih a sawi.
WHO hian January 2020-May 2021 inkar data kimchang chu Ningani khan tichhuakin, healthcare nunna chan zatte hi a sawi a ni. Khawvel pumah healthcare lama thawk hi mi maktaduai 135 vel an awm a ni. He data in a huam chhunga Covid vanga nunna chan hi khawvel ram hrang hrangah maktaduai 3.45 vel an awm bawk.
Clinic leh hospital-a hnathawkte hi kum 2019 kum tawp lama China khawpui pakhat Wuhan-a Covid-19 hripui len tirh aṭang khan hri dona kawngah ral hmatawngah an awm tawh a, an zinga tam tak chu chau tawngkhawnga thawkin anxiety te pawh an neih phah hial a, hetih lai hian hri hi a la kiam rih mai dawn lo niin a lang.
Ram tam takah healthcare worker-te chu vaccine sem chhuah kawngah ngaih pawimawh hmasak an ni ṭhin a, mahse rualkhai taka vaccine semchhuah a nih ṭhin loh avangin chawhrualin mi panga zinga mi pahnih chuahin dose bikimin an la la tih WHO chuan a sawi.
"Healthcare worker zawng zawngte venhim chu kan mawhphurhna a ni a, an dikna an hmuh theihnan leh boruak muanawm tak hnuaia an thawh theih nan kan ṭanpui tur a ni. Hei hian vaccine an lakna pawh huam tel rawh se," tiin WHO Health Workforce Department Director Jim Campbell chuan a sawi.
Kumin September thla thleng khan ram 119 aṭanga data lakkhawm tarlan danin African leh Western Pacific region-a healthcare worker mi 10 zel zinga pakhat aia tlem chauhin vaccine dose bikimin an la a ni. Hetih lai hian ram hausa zual 22-ah chuan staff zinga 80% chuangin dose hnihna an la tawh tih an sawi. Ram hausa ṭhenkhatte chuan WHO hnenah hian data report an la thehlut lo bawk.
"Healthcare worker zinga hri kai leh thihpui zat chu a tlahniam ve zel a, mahse khawvel ramte chu ngaihṭha takin kan awm hman lo a ni. Hnathawhna hmuna hri inkaichhawn theihna kan tihtlem theihnan nasa zawka kan thawh zel a ngai," tiin WHO thuchhuah chuan a tarlang.
