Bangladesh-a Rohingya refugee camp beihnaah mi pasarih thi

Bangladesh leh Myanmar inrina bul, Bangladesh ram lama Rohingya refugee camp-a inbeihna thleng vangin camp-a khawsa zinga mi pasarih an thi tih Bangladeshi police te chuan an sawi.

Regional police chief chuan pawikhawihtute hian silai leh chem hmangin camp-a chengte hi an bei tih a sawi. Inbeihnaah hian mi palite chu a hmunah an thi nghal a, midang pathumte chu Balukhali camp-a damdawi-ina hruai an nih hnuah an thi ve leh a ni. Hliam tuar mi engzat nge awm tih police te hian an puangzar lo.

"Pawikhawihna thlentu zinga pakhat chu a hmunah hian kan man nghal a ni," tiin regional police chief Shihab Kaisar Khan chuan a sawi. Misual an man hian silai leh a mu bakah chemte a pai thu a sawi.

Kar thum liam ta khan Rohingya community leader Mohibullah chu a office kawtah kahhlum a lo ni tawh a, he thil thleng vanga boruak a ṭhat loh chhoh mek laiin Rohingya raltlante awmna camp hi beih a ni zui leh nghal a ni.

Pawikhawihna thlen hnu hian home minister Asaduzzaman Khan Kamal chuan Cox Bazar district-a Rohingya camp-ah venhimna khauh zawk siam a nih tur thu a sawi."Venhimna belhchhah turin thawktu dah belh an ni dawn a, dan kenkawhna ṭha zawk siam a ni ang" tiin Kamal chuan a sawi. Refugee camp-a ruihhlo lakluh leh zawrh ṭhin pawh tihtawp tumin an bei dawn tih a sawi. Bangladesh leh Myanmar ram inkara luipui inkalpawh theihna awmchhun Naf luiah pawh ngawrh zawka enthlithlai a ni ang, a ti.

Kamal chuan camp-a thirhungna, barbed wire fence siam hna pawh zawh fel a ni ṭep tawh a, camp-ah chuan mihring chetvelna enfiah turin watchtower ṭhahnem tak a awm bawk tih a sawi. Hetih lai hian Rohingya activist-te chuan Mohibullah thah a nih hnuah camp chhungah hlauhthawnna lian tak a la awm a, mi ṭhenkhat chu an la biru niin a sawi.

Nikum December thla khan Bangladesh sorkar chuan Rohingya raltlante hi Basan Char Isand lamah a sawnchhuak a, mi 20,000 vel sawnchhuak tawhin midang 80,000 pawh United Nations nena inremna an lo ziah tawh angin sawn chhuah belh a tum bawk.

Bhasan Char hi Bangladesh chhim­thlanga tuipui kama awm niin, an ram khawpui Dhaka aṭangin km 193 vela hla a ni. Raltlante awmna tur hian sorkar chuan cluster house 1,400 sain,in pakhatah hian room 16 zel a awm a ni.