Myanmar sipaite chuan Mandalay khawpui pana tlan, truck pakhat aṭangin ralthuam ṭhahnem tak an tak man a, a neitu nia puh mi pali an tel bawk.
February 1-a Aung San Suu Kyi kaihhruai civil sorkar paihthlak a nih avanga lungawi lohna lantirtute leh sipai rorelna dodaltute chu sipaite chuan a la bei chhunzawm reng a ni. Lungawi lohna lantirtu zinga mi tam tak chu thah leh man an ni tawh.
Sipai rorelna dodaltute hian civil sorkar aiawhtu, National Unity Governmetn (NUG) an din a, sipaite beih lettu tur armed wing, People Defence Force (PDF) pawh an din tawh bawk. PDF hian Kachin Independence Army (KIA) helpawl hnenah training-te neiin, an hnen aṭang hian ralthuamte pawh an nei a ni. Mahse ralthuam erawh an la nei ṭha lo hle thung.
Global New Light of Myanmar chuan sipaite ralthuam man hi silai 100, silaimu 10,000, grenade 499 bakah bomb leh a tihpuahna hmanruate a nih thu a tarlang. Ralthuam neitu nia puha mante hi PDF member nia sawi a ni.
Tunkar Thawhlehni khan Mandalay-ah PDF leh sipaite chu inbei lehin, PDF member pariat thah an ni a, midang pariat chu sipaiten an hreng zui bawk. He inbeihna thlen hnu lawkah sipaite hian PDF member-te kut aṭang hian ralthuam ṭhahnem tak hi an man zui a ni.
Mi nuai 2.3 vel tlanchhe tawh
UN Office for the Coordination of Humanitarian Affairs (OCHA) chuan Ningania report a tihchhuahah, Myanmar rama tualchhung buaina thleng meka hel leh sipaite inbeihna avangin kumin chhungin mi nuai 2.3 vel chu an chenna aṭanga tlanchhiain, chhawmdawl ngaiin an awm mek tih a sawi.
UN body chuan mipuite chhawmdawl hna hi thawh reng ni mah se, sipai leh helte inbeihna vang te, ramchhunga tharum thawhna thleng ṭhin avang0 tein hna thawh pawh a khaihlak fo tih an sawi bawk.
Thailand ramri bul, Karen state-a cheng mi nuai 1.77 vel chu thla liam ta chhung khan an tlanchia a, Chin State-a Myanmar sipai leh People's Defence Force-te inbeihna avangin mi 20,000 chu tlanchhiain, hmun hrang hrangah an khawsak mek bawk a ni.
Myanmar rama chibing helpawl lian ber zinga mi, Karen National Union (KNU) chuan sipaite beihna vangin civil mi tam takin nunna an chan a, tharum thawhna nasa takin a thleng tih sawiin, KNU chuan sipaiten an duh dan anga ro an relna titawp turin a bei zel dawn a, mipuite humhim turin theihtawp an chhuah zel dawn tih an sawi.
Member ram 10 awmna Association of Southeast Asian Nations (ASEAN)-in Myanmar tualchhung buaina thleng mek titawp tura sipai leh eptu pawlte inkara inbiakna nei tura a hmalakna chu a la hlawhtling lo. Sipaite hian an lo ruahman tawh anga thil kalpui an tum thu leh, kum hnih chhunga inthlanpui buatsaih an tum thu an sawi a ni.
