Ram 85-ah Covid-19 Delta variant hmuchhuak tawh : WHO
Covid-19 hri inkaichhawn awlsam tak, India rama hmuh chhuah Delta variant chu khawvel hmun hrang hrangah a darh chho zel a, ram 85-ah he hri hi hmuhchhuah ni tawhin, ramdangah pawh hmuh belh zel a nih thu World Health Organization (WHO) chuan a sawi.
June 22 thleng khan Alpha variant hi ram 170-ah hmuhchhuah a ni tawh a, Beta hi ram 119, Gamma variant chu ram 71 leh Delta variant chu ram 85 ah te hmuhchhuah an ni tawh tih WHO chuan a tarlang.
"Delta hi ram 85 ah hriatchhuah ni tawhin, WHO hnuaia ramah te pawh hmuhchhuah thar zel a ni, heng zinga ram 11-ah chuan he hri hi kar hnih liamta chhunga hmuhchhuah an ni," tiin WHO chuan a sawi.
WHO hian tuna hri inthlak danglam pali, Alpha, Beta, Gamma leh Delta-ah hian vaccine hna thawk ṭha thei loa siamtu "variant of concern" a awm em tih chu uluk taka zirchian mek a ni tih a sawi. "Delta variant hi Alpha variant aiin inkaichhawn a awlsam zawk a, tun anga a darh chhoh zel chuan hri tam ber a ni chhoh mai a hlauhawm a ni," a ti.
Khawvelah hri kai mtd 179.9 awm tawh
John Hopkins University data-a a landanin, nimin thleng khan khawvelah Covid-19 hri kai hmuhchhuah mi maktaduai 179.9 an awm tawh a, an zinga maktaduai 3.89 in an thihpui tawh bawk.
US chu hri kai leh thihpui tamna ber ram a la ni chhunzawm zel a, hri kai hi 3,35,90,360 awm tawhin mi 6,03,149 in a thihpui tawh. India chu hri kai tamna ber dawttu niin, hri thihpui tam ber dawttu chu Brazil a ni thung a, Brazil-ah hian Covid-19 vang thi hi mi 5,09,141 an tling tawh a ni.