United States President 46-na atan kum 78 mi, Joseph Robinette Biden Jr chu January 20 khan rinawmna thu tiamtira lakluh a ni ta. US Capitol West Front-ah Chief Justice John Roberts chuan Joe Biden hi rinawmna thu tiamtirin President atan a lalut. Biden lakluh hma hian Kamala Devi Harris chu Supreme Court Justice Sonia Sotomayor chuan Vice President atan rinawmna thu tiamtirin a lalut bawk. Biden hian a nupui, Jill Biden-in Bible a lo ken sak chungah a kut nghatin rinawmna thu hi a tiam a ni. President thar lakluh inkhawmah hian US President hlui - Barack Obama, George W Bush, Bill Clinton leh an nupuite an tel a, vice president kalchhuak Mike Pence pawh a tel. Mahse Biden-a'n a thlak tak, President kalchhuak Donald Trump erawh a tel ve lo thung.
Mipui pungkhawm tam thei lo
US Capitol-a President thar lakluh inkhawm hi Covid-19 hripui leng vangin ṭum dang angin mipui tam tak punkhawm theih a ni lo. Lawmluh inkhawmnaa tel tura kum danga Congress member te hnena semchhuah tura ticket nuai hnih vel pek ṭhin chu, kuminah chuan member-te hi anmahni leh midang pakhat tan chauh zel ticket pek an ni tih Joint Congressional Committee on Inaugural Ceremonies chuan a tarlang.
A hma aṭangin America mipuite chu hripui leng vangin President thar lakluh inkhawm hi a hmuna tel ve kher tum lo a, in lamah TV aṭanga lo en mai turin thuneitute pawhin an lo ngen tawh bawk. Hripui leng vangin President thar hian an tihdan phung ṭhin, inaugural ball pawh a nei thei lo a, hemi aiah hian TV programme buatsaih, 'Celebrating America' tihah a tel ta zawk a ni.
America mipui zawng zawng President ka ni ang : Biden
Lakluh a nih hnua US President a nihna anga thu a sawi hmasak berah, Biden chuan America mipui zawng zawng tana President a nih tur thu a sawi. Candidate pakhat chakna lawm an ni lo a, Democracy chakna lawm a ni tih sawiin, "America ni, Democracy ni, beisei kan neihna ni kan thleng ta a ni," a ti. An ram mipuite duhthlanna chu an hria a, an duhthlanna chu ngaihsak a ni dawn a ni, tiin a sawi.
Inpumkhat a ṭul thu sawiin, Biden chuan America inpumkhatna, mipuite inpumkhatna turin theihtawpin a bei dawn a, hemi atana theihtawp chhuahpui turin America mipui zawng zawngte a sawm nghal bawk. America mipui, amah vote tu leh vote lotu tan pawh President a ni dawn tih Biden chuan sawiin, tualchhung buaina, party inkar, thingtlang leh khawpui inkar, conservative leh liberal inkara indona awm chu an tihtawp a hun tawh tih a sawi.
President nih tumna ṭum hnih hlawhchham tawh
President thar Joe Biden hian a hmain US President nih a lo tumna chu ṭum hnih alo hlawhchham pui tawh a ni. US Senate-ah kum 29 mi chauh a nih laiin thlan tlin a ni a, kum 2009-2017 chhunga President hlui Barack Obama hnuai vice president a ni hma zawng, kum 36 chhung Senate member a ni. Kum naupang tein Senate member ni thei mah se President dinhmun a luah hian kum 78 mi ni tawhin, a term khatna atana US President atana lakluh zingah upa ber a ni tawh thung.
Kum 1988 khan Democrast presidential candidate nih tumin a lo chuh tawh a, mahse thu a sawinaah British Labour party hruaitu Neil Kinnock-a thusawi lachhawnga puha nasa taka sawizui a nih hnuah a inhnukdawk a ni. Kum 2008 khan president candidate nih tum hian a chuh leh a, mahse thlawptu a neih tam tawk loh avangin a inhnukdawk leh a, a hnuah Democractic party presidential candidate a ni a, Barack Obama chuan a thawhpui atan thlangin, vice presidential candidate-ah dah a ni ta a ni.
