Nagaland chief minister, Nagaland State Disaster Management Authority (NSDMA) chairman ni bawk Neiphiu Rio kaihhruaiin Kohima-a Civl Secretariat-a Chief Minister conference hall-ah fur lo thleng tur atana inpuahchah lawk dan ngaihtuahin Thawhlehni khan meeting neih a ni.

Chief Minister chuan sorkar department hrang hrangte chu ruahtui tlak tak tak hmaa district hrang hranga mamawhte ngaihtuah a, hma la turin a hriattir. Khawpui emaw thingtlang khua emaw aṭanga ni tin mamawh indaih lohna chungchangah complaint a awm chuan thuneitu sang lamah report thuai turin a ti. Department chu fair price shop enfiah a, consumer-te dikna chanvo humhalh a nih leh nih loh enfiah turin a hriattir bawk.

CM chuan chief secretary chu deputy commissioner zawng zawngte video conference neihpui tur leh, district hrang hranga bungraw pawimawh (essential commodities) dinhmun leh inbuatsaih dan kimchang puang ṭhin turin a hriattir bawk a ni.

Rio chuan traffic thurawn chungchangah pawh ngaihtuahna a sen thu sawiin, PWD department chu national highway-ah truck-in ton engzat nge a phur theih tih enfiah turin a hriattir a, ton engzat nge ruahtui tlak laiin an phur theih tih chiang taka enfiah a ngai a ni, a ti. Administration leh police department chu ruahtui tlak laia khawpui hrang hrangah leh national highway-ah lirthei tlan dan mumal tak a awm theih nan, officer leh Dobashi team-te chu kawng enfiah ṭhin turin a ti a, Nagaland State Quality Control Board chu a hma thei ang bera siamṭhat a ṭul thu a sawi bawk.