Arunachal Pradesh : Haryana mi 50 chuang man

Arunachal Police-te chuan Navodaya Vidyalaya Samiti (NVS)-in hna lak exam an buatsaiha dik lo taka exam hmachhawntu, Haryana aṭangin mi 50 chuang an man. Police superintendent, Rohit Rajbir Singh chuan press conference-ah an mi mante hian electronic device hmangin an entawn tih a sawi. He exam hi May 18 khan neih niin, lab assistant leh junior secretariat assistant (JSA) hna te an ni.

"Exam naah hian electronic device changkang tak tak, GSM-enabled gadget leh micro earpiece hmanga thil dik lo tih tumtu mi 53 man an ni a, device 29 man sak an ni bawk. Man zinga enge maw zat chuan an thil tihsual an inpuang tawh a ni," tiin Singh chuan a sawi. Candidate 23 te chu Kingcup Public School aṭanga man niin, rinhlelh dang pakhat chu Vivekananda Kendra Vidyalaya aṭanga man a ni. A hnu lama chhui chian a nih hnuah rinhlelh dangte pawh man an ni ve leh ta a ni.

An vai hian Bharatiya Nyaya Sanhita, IT Act, leh Public Examination (Prevention of Unfair Means) Act section hnuaiah thubuai siamsak an nih thu SP chuan sawiin, Niti Vihar leh Chimpu Police Station-ah FIR hrang hrang ziah luh a nih thu a sawi bawk.

"Exam ni-ah hian an gadget thuhruk hmangin pawn lam mite nen a inbepawp a ni. Device chhungah question paper code chu sawiin, chhanna an dawng nghal zel a ni," tiin SP chuan a sawi. Hetianga thil dik lo tihna hi Gangtok, Chandigarh leh Shimla-ah pawh report a ni.