Meghalaya chief minister Conrad K Sangma chuan nimina Assembly rorel inkhawmah financial year 2025-26 atana Rs vbc 1,970 deficit budget a pharh. Rs vbc 1,970 budget hi GSDP, Rs vbc 66,645 ruahman aṭanga zaa 2.96 vel a ni.

Chief Minister-in budget a pharhah hian 2025-26 chhunga sum hmuh tur chu Rs nuai 30,415 a chhut a ni a, hei hi revenue receipt Rs vbc 25.591 leh capital receipt Rs nuai 14,324 a ni. Sum puk tur, borrowing tel loa sum hmuh tur hi Rs vbc 24,788 a chhut a ni a; loan rulhna tur Rs nuai 2,406 huam tel loa sum hmanral tura chhut hi Rs vbc 27,597 niin, sum in daih lohna tur zat hi Rs vbc 1,970 a tling. Sum indaih lohna tur hi phal chin, 2.5% hnuaiah a awm tih a sawi.

2023-26 chhunga kum khata state economy growth rate chu 12.7% a ni a, 2028 atana an target (USD tld 10 economy) an hlen chhuah tur thu CM Sanghma chuan a sawi bawk.

CM chuan kumin chhungin state-in chhiah a hmuh zat a pun nasat thu sawiin, Rs vbc 4,041 a tling a, 2017-18-a Rs vbc 1,450 aṭanga a let 3 velin a pung tih a sawi. 2025-26 chhung state-in chhiah aṭanga a sum hmuh tur hi Rs vbc 4,226 tling tura chhut a nih thu a sawi.

House hnenah climate budget tam zawng chu Rs vbc 5,421 a nih thu CM chuan a hrilh a, 2024-25 aiin 20% a pung a, ṭhalai budget chu Rs vbc 3,329 niin, 16.6% in a pung a, gender budget chu Rs vbc 6,219 niin 25% a pung bawk a ni.

Budget thara hmalakna tur tarlan zingah state chhunga post-matric zirlai zawng zawng tan Rs 6,000 scholarship pek a nih tur CM Sangma chuan a sawi. Tourism lam tih hmasawnna turin project thar, Rs vbc 600 senga thawh a ni dawn a, heng zingah hian Mawsynram-a Rain leh Bamboo Interpretation Centre sak, Wari Chora Cultural Centre sak, Wahlyngkhat Living Root Museum sak te a tel. Adokgre, Sohiong, leh Nongnah-ah te pawh luxury resort siam tum a ni bawk. State tlawhtu khualzin pung zel phuhruk nan sorkar chuan state puma tourism facility tihchangtlun a tum.

East Garo Hills, Eastern West Khasi Hills, leh Ri-Bhoi district headquarters-ah te business tourism tih hmasawn nan convention leh hospitality center siam a ni bawk ang. Tourist spot awmsa, Umiam Lake, Sohra Waterfall Trails, leh Dawki Riverfront pawh chei ṭhat a ni ang. Hei bakah hian luxury resort thar pali leh five-star hotel, Rs vbc 900 seng siamna tur turin Umiam, Sohra, Mawdiangdiang, leh Khanapara te tihfel a ni.

Budget-ah hian tourism hi ngaih pawimawh ber a nih laiin sector dang, Agriculture leh Farmer Welfare-ah investment lian tham tak tak, Rs vbc 618 ruahman a ni a, horticulture leh post-harvest infrastructure-te ngaih pawimawh a ni. Infrastructure Development, kawngpui inkalpawhna atan Rs vbc 2,873 ruahman niin, Shillong Western Bypass leh Border Economic Corridor siam tum a ni.

Education sector tan Rs vbc 3,654 ruahman niin, heng zingah Rs vbc 2,770 chu state sum lak luh aṭangin a ni ang. Education sector hnuaiahhian scholl infrastructure tih changtlunna turin Rs vbc 150 dah a ni dawn a, senior secondary school 37 building chu sak ṭhat leh chei ṭhat niin, DIET hostel pali sak a ni bawk ang. Digital library 750 siamna turin central scheme hnuaiah Rs vbc 162 hmuh a nih thu CM chuan a sawi bawk.

Public works tan Rs vbc 2,873, power ta Rs vbc 1,088 leh public health engineering tan Rs vbc 866 dahin power sector tan Rs vbc 1,088 dah a ni.Health sector tan Rs vbc 2,176 dah a ni a, medical infrastructure tih zauh leh Chief Minister’s Safe Motherhood Scheme atan Rs vbc 3,654 ruahman a ni.

Infiamna lam tih changtlunna turin Rs vbc 1,900 ruahman a ni a, heng zingah hian Rs vbc 732 senga Mawkhanu Football Complex sakan tur a tel a, Meghalaya chu India Football Capital-a siam tum a ni bawk.

Startup leh sumdawnna tenaute ṭanpuina turin PRIME leh CM-ELEVATE programme atan Rs vbc 70 dah a ni a, Chief Minister’s Skills Mission atan Rs vbc 100 ruahman a ni.