14th Nagaland Legislative Assembly (NLA) session vawirukna chu Thawhṭanni khan Assembly Hall-ah neih ṭan ni a, March 8 thleng neih a ni dawn. March 6-ah kum 2025-2026 atana state budget pharh a ni ang.
Session ṭanni hian governor La. Ganesan-a'n thu a sawi a, chief minister Neiphiu Rio-a'n December 26, 2024-a kum 92 mi nia Delhi-a thi ta, prime minister hlui Dr. Manmohan Singh sunna leh hriatrengna thu a sawi bawk.
Governor Ganesan chuan state sorkar hnathawh hrang hrangte leh a hlawhtlinna neihte a tarlan bakah, a hmachhawp neihte a sawi. Naga politics buaina chungchangah state chhunga tribal pawl leh civil society organization-te nen September 12, 2024 khan consultative meeting neih a nih thu a sawi. Hei bakah November 21, 2024 khan Chief Minister leh a cabinet minister-te chuan Union Home Minister an hmu a, state mipuiten Naga politics buaina chu a hma lama chinfel an duh an thlen a ni tih Governor chuan a sawi. Frontier Nagaland Territorial Authority (FNTA) chungchangah state sorkarin November 6, 2024 khan Ministry of Home Affairs-a inremna siamna tur a duan, Memorandum of Setllement draft pathumna chu a theh lut tawh tih a sawi bawk.
Nimin khan Governor thusawi chungchang hi sawi ho a ni a, vawiinah session hi chawlin naktukah an chhunzawm leh dawn a ni. Governor-in a sawi lan zingah hian kumin January 31 thleng khan PM-KISAN hnuaihah state chhunga loneitu 2,21,931 hnenah Rs vbc 620 pek a nih tawh thu a sawi. Mission Organic Value Chain Development chuan ram hectare 30,300 huama zauah kalpuiin, hei hi loneitu 31,104 in an hlawkpui thu a sawi bawk. National Livestock Mission (NLM) hnuaiah vawk vulhna farm 26 siam a ni a, hei bakah Chümoukedima, Niuland, leh Shamator-ah veterinary hospital sak mek a ni, a ti. MGNREGA hnuaiah February 11,2025 thleng khan mi nuai 65.94 te hnenah inhlawhna siamsak a ni a, PMAY-G hnuaiah 2024-25 chhungin in 9,191 sak ni bawkin, he scheme hnuaiah hian in 20,569 sak a nih tawh thu Governor chuan a sawi.
Chief Minister, finance changtu ni bawk Neiphiu Rio chuan March 6-ah state budget 2025-2026 a pharh ang a, a tukah budget chungchang hi sawi ho a ni ang. CM hian session ṭanni khan 2024-2025 supplementary demand for grants a pharh tawh bawk a ni. Session tawp ni, March 8-ah Comptroller and Auditor General of India report a p pharh bawk ang.
