Meghalaya : Assam ramriah BOP thar 7 siam

Meghalaya deputy chief minister, Prestone Tynsong chuan Assam nena ramri chungchanga buaina an neih mekna, district paliah border outpost (BOP) pasarih an siam thar thu Thawhṭanni khan a sawi.

BOP pasarihte hi Ri Bhoi district-a Rani-Jirang; West Khasi Hills district-a Langpih, Lejadubi leh Umwali; East Jaintia Hills-a Mooria leh West Jaintia Hills-a Tihwieh leh Mukroh-ah siam a nih thu Assembly-a call attention motion a chhannaah Tynsong chuan a sawi.

Deputy CM chuan sorkar chu ramria chengte dikna leh himna humhalhsak tura a inpeih reng thu sawiin, an harsatnate sutkian nan a ṭul anga hmalak chhunzawm zel a ni ang, a ti. Ramri buaina chinfelna kawngah hian khawtlang hruaitute leh tualchhung mipuite pawh tel tir tum an ni, tiin a sawi bawk.

Assam leh Meghalaya hian 2022 March khan ramri buaina an neihna hmun 12 zinga hmu parukah inremna an lo siam tawh a ni. He inremna siam hian ramri km 884.9-a thui a huam a ni.