Meghalaya chief minister Conrad K Sangma chuan Financial year 2025-26 atana live pre-budget consultation session neih hmasa berah state in chhiah a hmuh zat chu kum 2018-a Rs vbc 1,450 aṭangin 2025-ah Rs vbc 3,217-ah a pung tih a sawi.

Chief Minister Sangma chuan excise revenue pawh kum ruk chhungin Rs nuai 199 aṭangin Rs nuai 458-ah a pung tih sawiin, kuminah Rs nuai 520 a pelh theih a beisei thu a sawi bawk. Hetianga hmasawnna hi sorkarin sum lak luhna tih changtlun a tum vang a nih thu a sawi a, a bik takin excise sector lamah ṭan an la chho nin a sawi.

Chhiah lakna kawnga felhlel awm thinte siamṭhatna tura technology pawimawh thu CM chuan a sawi uar hle a, thil hralhna thleng apiang enfiah leh chhuizui tur system ṭha a ṭul thu a sawi.

CM hian zirna sector lam pawh a ngaih pawimawh thu sawiin school leh higher leh technical education atana budget a tihpun thu a sawi. Education sector tana budget dah hi Rs vbc 1,085 aṭangin Rs vbc 2,338-ah a kai chho a, a punna hi 14% a tling a ni, ati. Kum li kal ta chhungin school 2,500 dawn chu a building thar sak emaw, siamṭhat emaw an nih thu a sawi a, Shillong Medical College chu September-October 2025 chhunga hman ṭan theih a nih tur thu a sawi bawk.

Tura Medical College chungchangah CM Sangma chuan staff lama harsatna an tawh te a sawilang a, a bik takin doctor leh professor indaih lohna awm chu chinfel tumin hmalak mek a ni, a ti. Zirna lama private investment tih larna tura a hmathlir te sawiin, CM chuan private university tam zawk siam turin a nawr mek a, thla thar lamah chuan thu lawmawm tak a awm ngei a beisei thu a sawi a ni.