Hamrchhak state pathum- Manipur, Arunachal Pradesh leh Assam-te chuan tuilian vangin harsatna an tawk mek a, tuilian hian khaw hrang hranga chengte bakah an ran vulh leh inkalpawhna thlengin a nghawng a ni. Heng a nih avang hian state pathumah hian chhanchhuah hna thawh mek niin, mipuite chu hmun him lamah thiar chhuah an ni. Mahse ruah surin ziaawm lam a la pan theih loh vangin tuilian hian kam lam a la pan thei lo thung.
Manipur :
India Meteorological Department (IMD) in Manipur-ah July 1 aṭangin ni nga chhung ruah a sur dawn tia a tarlan angin Manipur chhungah ruah nasa takin a sur a, Imphal lui leh Nambul lui tui a lian chak hle. Imphal West, Imphal East, Kangpokpi, Senapati, Thoubal leh Bishnupur District-ahte chuan lui tui a kuang aṭanga a liam avangin tuilian vangin buaina a nasa hle.
Manipur Governor chuan tuilian vang hian nimin khan state pumah chawlh a puang a, zirna-inte pawh nimin leh vawiin an chawl dawn tih education department in a puang ve bawk. Sorkar chawlh puan hian chhanchhuah hna thawktute erawh a huam tel lo thung. Manipur University chuan tuilian vanga state pumah harsatna an tawh vangin semester exam zawng zawng sawn a nih thu an puang. University chuan thuchhuah siamin, zirtirtu leh zirlaite himna an ngaihtuah vangin exam chu sawn a nih thu leh, exam hun tur chu a hranpaa la tihchhuah tur a nih thu an sawi bawk.
Senapati-ah Thawhlehni khan chirh tawlhin mi pakhat chu a lirthei nen a hnawl. Hemi bakah hian Thawhṭanni khan mipa naupang kum 17 mi chu Senapati luiah hian a lo tla tawh bawk. Sorkar chuan mipuite chu pawn chhuak tam lo tura chahin, chhanchhuah hna ṭha taka an thawh theih nan mipuite thlawpna chu a ngen bawk a ni.
Arunachal Pradesh :
Arunachal Pradesh-a lui tam zawk chuan hlauhawm chin chhinchhiahna an pel tawh a, anmahni fintu lui dangte pawh an chim chin a sang tawh hle a ni. State chhunga district pali- Namsai, Lohit, Changlang leh East Siang te chuan tuilian vang hian harsatna an tawk nasa zual niin thuneitute chuan an sawi.
East kameng district khawpui, Seppa-ah lui lianin in tam tak a len chhia nia tarlan a ni bawk. Arunachal water resource department-in a tarlan danin, Namsai leh Wakro district-ah khaw 34 chuangin tuilian vangin harsatna an tawk. District thuneitute chuan mipuite chu fimkhur tura chahin inralring reng turin an hriattir. Tuilian bakah hian leimin chuan Pasighat-Yingkiong leh Pasighat-Aalo highway-ah harsatna a thleng nia tarlan a ni bawk.
Assam Rifles chuan chhanchhuah hna thawkin tuilian vanga harsatna tawhna hmuna awmte chu hmun him lama sawnchhuah hna an thawk a ni. Lohit, Namsai leh Changlang district-ah chuan Assam Rifles in ni hnih chhungin mi 1,400 chuang an chhanchhuak hman nia tarlan a ni. Assam Rifles hian chhanchhuah hna mai bakah chenna hmun chhuahsantute tan ei leh in tur bakah an nitin mamawh hrang hrang an pe bawk a ni.
Assam :
Assam state chu hmarchhak state zinga tuilian tuar nasa ber niin mi 38 an thi tawh a, district 28 chuan buaina tawkin mi nuai 11.34 a nghawng mek a ni. State chhunga tuilian tuar na zual district pathumte chu- Lakhimpur, Darrang leh Golaghat te an ni.
Tuilian hian thlai chinna hmun hectares 42,476-a zau a chim tawh a, khaw 2,208 chuangin an tuar mek bawk a ni. Lui hrang hrang- Brahmaputra, Subansiri, Burhidihing, Dikhou, Disang, Dhansiri (S), Jia-Bharali, Puthimari, Kopili, Beki, Kushiyara, Barak leh Dhaleswari te chim chin chuan hlauhawm chin a pel tawh bawk. Chhawmdawl hna hi thawh reng niin chhawmdawlna-in 489 siam a ni tawh a, mi nuai 2 chuang an cheng mek a ni. Heng chhawmdawlna ina awm lote chuan sikul leh hmun remchang lai, tuiin a chim lohna hmunah awmhmun an khuar mek bawk.
District thuneitu, Army, paramilitary forces, SDRF leh Circle Office te chuan chhanchhuak hna an thawk a, Thawhlehni khan state chhung hmun hrang hrang aṭangin mi 2,900 chhanchhuah nia tarlan a ni. Tuilian vanga an in leh lo chhuahsante tan hian eitur sem niin buh, dal, chi leh tel bakah an ran vulhte ei tur thlengin pek tel an ni bawk. Tuilian vanga harsatna hi mihring bakah ran vulh lai nuai 8 chuangin an tuar a, hemi bakah hian kawng 74 tihchiat niin lei (bridge) paruk leh luilian dangtu 14 a tichhe tawh bawk.
