Manipur : COCOMI leh UNC in state chhungah NRC neih an duh

Manipur chhungah dan loa raltlante hriat chhuah an nih theih nan state chhungah National Register of Citizens (NRC) kalpui an duh tih Coordinating Committee for Manipur Integrity (COCOMI), Manipur leh United Naga Council (UNC), Manipur chuan an tarlang.

COCOMI leh UNC aiawhte hian Manipur Governor Anusuiya Uikey chu Thawhlehni khan Raj Bhavan-ah hmuin, NRC neih an duh thu hi an thlen a, memorandum an thehlut nghal bawk. Pawl pahnihte hian NRC chu hmanhmawh taka kalpui ni se an duh tih tarlangin, a base year atan kum 1951 hman an duh tih an tarlang tel bawk. NRC neih chu dan loa Manipur rawn lut ṭhinte danchah nan leh state chhunga hnam dang pung chak lutuk ven nan a ṭangkai dawn tih tarlangin, heng vang hian Manipur ram leilung fate chuan harsatna an tawh phah niin an sawi bawk.

Pawl pahnihte hian NRC kalpui bakah hian khaw din thar hriatpuina pek ṭhin chu zirchianna awm hmasa lo chuan tihtawp ni se an duh thu an sawi a, district ṭhenkhata khaw pung chak lutuk chu enfiah ni se an duh tih an tarlang tel bawk a ni.

Governor Uikey chuan NRC chu state chhungah kalpui a ni dawn tih sawiin hun rei lote nghah a la ngai niin a sawi thung. State chhung buaina chu India President, Finance Minister leh Union Home Minister te nen sawi ho a nih thu leh a ṭul anga hmalak an tum thu a sawi. Uikey chuan Manipur mipuite tana ṭha ber turin hma an la zel dawn tih a sawi.