India rama media organization lian, India Today-in New Delhi-a 'State of the States Conclave' a buatsaihah Arunachal Pradesh chu Infrastructure, Law and Order leh Education-ah ‘Most Improved Small State’ award hlan a ni.
Assam pawhin ‘Most Improved Big State – Overall’ leh ‘Most Improved Big State for Economy’ award a dawng bawk. Hmarchhak state dangte pawhin award hi an dawng hlawm. Tripura-in best performing and most improved small state in agriculture, Sikkim-in best performing small state in education; most improved small state in governance, Mizoramin best performing small state in inclusive development and environment; most improved small state in economy, health and tourism, Nagaland-in best performing small state in law and order leh most improved Small state in entrepreneurship and cleanliness an dawng bawk.
Arunachal Pradesh chief minister Pema Khandu chuan he chawimawina hi union minister for environment, forest and climate change, Prakash Javadekar hnen aṭangin a dawng. CM Khandu chuan AP chu tlangram a nih avangin danglamna bik tak a nei tih a sawi a, state hmasawnna turin inkalpawhna ṭha chu an dah pawimawh ber thu a sawi. Khandu chuan PMGSY hnuaiah state chhung thingtlang hmun kilkhawr zawkte pawhin kawng ṭha tak tak an nei tawh a ni, a ti.
Trans Arunachal Pradesh hnuaiah kawngpui km 1800 chuanga thui siam hna thawh mek niin, 80% chu zawhfel a ni tawh niin CM chuan a sawi. Khandu chuan prime minister Narendra Modi hruaina hnuaiah, AP-ah rel leh thlawhtheihna hmanga inkalpawhna pawh tihpuitlin chhoh zel a ni, a ti.
An state khawpui, Itanagar chu rel in a pawh tawh a, hmun dangte pawl rela kalpawh an nih theihnan turin survey neih mek a ni, a ti. Hmun sang lai, Tawang pawh rela kalpawh tir tum vek a nih thu a sawi bawk.
