Manipur tlawhtu khualzin 14% in an pung : Biren Singh

Manipur chief minister N Biren Singh chuan nikum chhung khan Manipur tlawhtu khualzin chu kum 2016 aiin 14% in an pung tih a sawi. 

Biren Singh chuan nikum chhung khan ramchhung hmun dang aṭanga Manipur tlawhtu khualzin 1, 66,032 an awm tih sawiin, kum 2016 khualzin awm zat aiin 14%  zetin an tam tawh a ni, a ti. Kar liam ta Inrinni zana Imphal-a 8th International Tourism Mart hmannaah CM chuan he thu hi a sawi a ni. He inkhawm hi union minister of state (independent charge) for tourism Prahlad Singh Patel chuan a hmanpui bawk. Tourism Mart hi union ministry of tourism buatsaih niin, vawiin thleng neih a ni ang. 

CM chuan kum 2016 aṭang khan Manipur tlawhtu, ramdangmi bik khualzin chu 222% in an pung tih sawiin, ramdang mi tlawhtu an neih zat chu 10,000 dawn an tling tih an sawi. Kum 2016 nena khaikhinin, kuminah state chhunga nawrh leh bandh huaihawt chu 88% zetin a tlem tawh tih a sawi a, inlakhran duhtu pawlte pawikhawihna kaihhnawihah thihna thleng pawh 98% in a tlahniam tih a sawi. Kum 2017 khan helpawl pawikhawihna thlennaa thi hi mi 431 an awm laiin, kuminah chuan October thla tawp thleng khan mi pakua an awm. 

CM chuan economy lamah pawh an state-in hma a sawn chak thu a sawi. "Kum 2015-19 chhunga Manipur-a business registration ti chu 12,438 zet an awm a, hmarchhak state dang zawng belhkhawm aiin 74% zetin a la sang a ni," a ti.