Citizenship(Amendment) Bill 2016 duh lotu an pung zel a, Pathianni pawh khan Assam chhunga thuziak mi, poet, critics, painter leh cartoonist hmingthang tak tak chuan Citizenship Bill an duh lohna lantirin kawng an zawh.
Bill duh lotu te hi Dighalipukhuri-a Lakhiram Barua Sadan-ah pungkhawmin he bill in Assam a nghawng theih dan tur te an sawi a, mipuite hneh theih nan bill dodalna hla te sa in, bill kaihhnawiha Prime Minister Narendra Modi leh BJP hruaitute lem an ziah te an kenglang a, state anthem O mor aponar dex pawh an sa bawk.
Kalkhawmte hian placard te pawh an keng a, Dighalipukhuri-ah hian kawngzawh in hla te an sak bakah bill duh lohna lemziak, poem leh hlathu te an kenglang bawk a ni.
Critic pakhat Arindam Borkotoky chuan bill an dodal chhan chu ram danpui leh secular fabric kalh a nih vang a nih thu a sawi. "Bill hi pawm a nih chuan Bangladesh Hindu, dan loa ramchhunga awm te chuan khua leh tui nihna an nei ang a, kan ṭawng leh kan hnam tihdan phungah te nghawng ṭha lo tak a nei dawn a ni ", tiin a sawi.
Poet lar tak Nani Borpujari pawhin Assam mipuite chu an nep loh thu leh hnehna an chan ngei a rin thu a sawi a, thu leh hla thiam Arupa Patangia Kalita pawhin Assam mipuite chuan harsatna an tawh nasat tawh thu leh buma an awm dawn tawh loh thu a sawi ve bawk.
Poet lar tak Jiban Narah chuan Prime Minister leh President Ram Nath Koving hnenah te leh Chief Minister Sarbananda Sonowal leh governor Jagdish Mukhi hnenah te memorandum an thehluh dawn thu a sawi a ni.
Pathianni vek hian NGO Krishak Mukti Sangram Samiti-te pawhin bill duh lohna hi Guwahati-a Chandmari-ah an lan tir ve bawk.
Hetih lai hian Chief Minister Sarbanada Sonowal chuan a state mipuite duhna a tipuitling thei lo a nih chuan Chief Minister nih reng chuan awmzia a nei dawn lo tih a sawi. Sonowal chuan mipuite duhna chu tihhlawhtlin a nih loh chuan chief minister nih reng chuan enge awmzia awm ang? tiin a sawi a, hemi a nih avang hian Assam mipuite duhna humhim a nih theih nan theihtawpin hma an la dawn tih a sawi a ni.
Chief Minister a nihna angin ama thu ngawta thutlukna siam loin Assam mipuite ngaihdan la in thutlukna an siam dawn tih a sawi a, khua leh tui hlun zawkte pawh hemi chungchang hi a sawipui dawn tih a sawi.
CM chuan mipuite duhdan kalh chuan thutlukna an siam dawn lo tih sawiin state puma muanna a awm theih nan hma an lak dawn thu a sawi bawk.
