SUDDEN THAWNTHU THLIRNA

Kum 2000 AD hmalama Mizo tlangval thawnthu chhiar nachang hriate zawt la, Sudden cowboy bu pakhat pawh chhiar lo chu an vang ngawt ang. Sudden-a hming pangngai hman thin James Green, James Grover leh Jim Severn tih te a nih kha.

James Green emaw, Sudden hi, a ziaktu hmasa chu, ziakmi Oliver Strange a ni. Sudden thawnthu engemaw zat a ziak a. A thih hnuin Frederick H. Christian-a'n a chhunzawm ve leh a ni. Pu Lalsang­liana khan a let nual a, tunhnaiah Pu PL Liandinga hian Oliver Strange-a ziah ho hi a let zo tawh a, a buin a ti chhuak vek tawh.

Sudden Thawnthu bu hrang hrangte han sawi hmasa ila:-

Oliver Strange-a khan Sudden bu sawm a ziak hman -

Sudden—Outlawed (1935)

Sudden (1933)

Sudden—Gold Seeker (1937)

Sudden Rides Again (1938)

Sudden Makes War (1942)

Sudden Takes the Trail (1940)

Sudden Plays a Hand (1950)

The Marshal of Lawless (1933)

The Range Robbers (1930)

The Law o’ the Lariat (1931)

Frederick H. Christian-a khan Sudden bu hi panga a ziak -

Sudden Strikes Back (1966)

Sudden—Troubleshooter (1967)

Sudden at Bay (1968)

Sudden—Apache Fighter (1969)

Sudden—Dead or Alive! (1970)

Sudden lehkhabute hi American Wild West hunlaia silai chelek thiam pakhatah a innghat a, chupa chuan amah enkawl sei liantu apa anga a en bumtu pahnih a zawng a. Jim-a, tleirawl te chuan a pa thi tur hnenah chuan, chu mite pahnih chu a zawng chhuak ngei ang a, phuba pawh ala ngei ngei ang tih a intiam a. James Green tiin a invuah chawp a, a hnulawkah rukru a puh a ni a, dan pawna hnawh chhuahin a awm a, outlaw a lo ni ta a ni.

Sudden-a thawnthu hrang hrangte hian Silai chelek thiam em em mai pa pakhat, kawlphe ang maia puakruk phawi ran vanga ‘Sudden’ tih hming hlawh chhuaktupa thil tawn hrang hrang a tar lang ber a. Tin, Sudden hi mi fing leh ngaihtuahna thuk tak mai, dan zaha ngaisang tak, a tul tawpah lo chuan silai chelek mai mai duh lo, mahni mihring puite zaha ngaihlu thiam, huaisen leh chak a ni a. A pa hmelhmate a zawn chhoh zelna kawngah chuan, Governor Blake-a, Arizona ram governor nen an intawng a, a ni chuan a ngaidam zui a, US Deputy Marshal a lo ni zui ta a ni. Kawng dang a sawi chuan, Governor Secret Agent a ni.

Ṭhenkhat chuan sudden lehkha­bua tawng kam hmante chu tunlai huna atan chuan pawm theih a ni lo an ti a. Ṭhenkhat chuan a tawng hmante hi chu a hunlaia mi a ni a, he’ng ṭawngkamte hi chu a hunlaia tawng an hman dan ber, mi tam tak tih dan ve reng a ni an ti thung. Sakawr dum Nigger chungah ala chuang zuia, Range Robbers-ah erawh kha chuan, ram sakawr nu a sawi hmin a, a hmangzui a ni. Hei hi a hnulawka a nupui la ni tur nen an la intawh tur thu tarlanna angah a ngaih theih bawk awm e.

Engpawh nise, a changtupa chuan Native American an tih, Red Indian-te a zah hle a, amah ngei pawh chu an enkawl sei len a ni a; chumai ala ni lo, Sudden lehkhabu ho hian chi inthliarna chu a ṭha lo a ti a, tu pawhin lo ti se, thil ṭha lo leh demawm a nih thu a pho lang a ni.

Sudden lehkhabute hi 1920 tawplam leh 1930 tir lamtea tih chhuah ṭan a ni a. America khawthlang lama ram leilung pianhmangte chiang taka tar lan a ni a, chu chu chu’ng hunlaia ziaktute chin ṭhan loh lam tak a ni.

Sudden thawnthu hrang hrangte hi a kal dan a inang tlang hle; Khaw pakhat dan bawhchhiatna hrang hrang hluarna leh boruak muanawm lohna hmunah Sudden a rawn lang nawlh a. Sudden chuan khaw mipuite zah a hlawh thuai a, thil dik lo a piang a bei a,mipui leh mi dik te awpbettu a tuk dawl a, mi chak lo te a veng him a, hmun dang pan turin chhuak leh ta ṭhin a ni- hetiang hi Sudden bu hrang hranga a thawnthu tlangpui a ni ṭhin. Thil awm ve ziah chu, kut tuma insualna, hmanrua pakhat mah hmang loin kuttuma an insual ang chite leh harsatna hrang hrang karah a changtupa a dingchang zel bawk te, ranch-a bawng ruk a ni ziah a, mi bawng vulha chhinchhiahna lo thlak sak te, saloon ṭawp tak, khaw mipui punkhawm ṭhinna tih ang chite hi a ni. Heng bakah hian, Silai hmang inbeihna, sudden-a puakruk phawi ranzia tar lang thei zawng hi a awm ve ziah bawk. Tin, Novel zawng zawngah hian, Sudden-a chuan tlangval la naupang deuh, amah ang em ema theihna nei sang ni chiah lo hi ṭhianah a nei ve ziah a, heng a ṭhiante naupang te hian a hmeichhe lo duh ve deuh hi a hnuah an kawp zui zel a, The Range Robbers-ah kha chuan amah Sudden a zawk kha hmeichhe zuna uai chu a ni ta thung a. Sudden-a thiltih ve ziah chu, inngaizawngte harsatna chingfelin, a inkawp tir leh ziah a, harsatna liante a ching fel zo a, khaw dangah, outlaw pahnihte zawngin a kal leh ta ṭhin a ni. The Range Robbers-ah outlaw pahnihte chu a tawng a, a hnulama a nupui la ni tur chu a tawng bawk a nih kha.

Sudden-a thawnthu te hi ‘potboiler league’ an tih mai, (pawisa hlawhchhuahna tura a hunlaia mi duhzawng leh lawmzawng anga piang ziahna lehkhabu lam ho sawinana hman) zinga mi niin, a thawnthu kal chhoh dan pawh mar put mai leh hrilhlawk theih deuh roh, a thawnthu ruangam chiang nghal kuk mai a ni chung hian, an inbiakna ngaihnawm leh pui tak tak mai te, one-liner an tih ang chi te, fiamthu tak deuh ril tak, awmze nei leh nuih ti za riau mai chi tea khat a ni a, chhiar a nuamin a kal zaih a, a ṭawngkam hman a dangdai a, a thil sawifiah dan hrim hrim a ngaihnawm a hlu danglam riau. Wild West hunlai thil hrang hrang-an nun dan, an tawngkam hman leh ṭawng dan phung leh an dan leh thil tihphung neihsa (customs) te a tar lang chiang em em bawk.

Sudden bua an ṭawngkam pahnih chauh lo tarlang ila: Sudden Rides Again bu-ah khan mi sual paliin saloon kawngkharah hmeichhe pakhat an lo dal a, Sudden chuan, “Ka pi kal tlang rawh; i kawng dal an awm a nih pawhin i rap mai dawn nia, an chunga kaltlang bak i tih angai lo ang,” a lo ti a ni. An dal lui dawn a nih chuan, a kap let tawp dawn tih a sawina a ni. Bu dangah pawh Sudden-a chu eng nge a thawh ber tih an zawh chuan, Sudden chuan “Fakna lam chu a ni lo phawt mai a ,” a lo ti a.

Mi ṭhenkhat chuan Frederick Christian hian novel bu hnih zet chu a thawnthu kalhmang inang deuh thawin a la chhawng a ni mai lo a, Sudden Strikes back phei chu a chhe theih tawpin a ziak chhuak a ni an ti. Khami buah khan mi pakhatin Sudden-a sakawr khalh a tum a, sakawr khan a khing thla a nih kha. Kha thil thleng lo thlirtu nula hming kha ‘Noreen’ tia tar lan a ni. Hetiang deuh hi The Range Robbers-ah pawh a awm. Hetiang chiah hian, Sudden at Bay leh ‘Sudden’ pawh kha a inang thui hle a ni. ‘Dead or Alive’ tih buah khan, Frederick khan Sudden kha nupui a sun tir a - Noreen chungchang a sawinaah a thih thu tar lang chiang zawngin a ziak a ni. Frederick Christian chuan a changtu (character) dang ‘ Angel’ a siam belh a. Sudden At Bay bua mi ang chiahin, thawnthu kal chho (ruangam) dang pawh a siam belh leh a, Angel pawh a lan kha.

TIHSUAL : Oliver Strange-a hian tihsual a nei a. Sudden-a hi Arizona Governor Bleke-a khan, US Deputy Marshall atana ruat angin a ziak a. Hei hi a dik lo a. US Marshall Service hi chu Federal Service a ni a. A ruattu hi US President a ni. George Washington-a hun lai aṭangin an ruat ṭan. Arizona Governor chuan Arizona Ranger chauh a ruat thei a. An jurisdiction pawh Arizona ram chhung chauh a ni.

Engpawhnise, Mizo ṭhalai tam tak lo awi tlei tawhtu thawnthu hi vawiin thlengin miin an la chhiar a, a la chhiar lo kan awm a nih pawhin, Mizo ṭawng leh Sap ṭawnga chhiar tur a awm kawp takah hi chuan chhiar thar ve leh hrim hrim ila, a lo chhiar tawh pawhin chhiar nawn leh ila, a ngaihnawmna a la bo chuang lo nia!