Mizoram sorkar chuan halmawi, halmawi, sky lantern leh silai lem a mu kap chhuak thei khap leh mah se, kumdang ang bawkin nizan leh tukin lamah halpuah leh halmawi ri hriat tur leh hmuh tur Aizawlah chuan a tam hle.

Halpuah, halmawi etc. khapna thupek hi DC-te chuan an district atan an chhuah hlawm a, mipuite chu halmawi, halpuah etc. zuar lo tur leh hal lo tura ngen an ni. Branch YMA-te pawhin Central YMA thu angin an huam chhungah halmawi, halpuah etc. hi an khap a, information mike leh social media kaltlangin mipuite an hriattir a ni.

Police-te chuan halpuah, halmawi etc. hi an vai reng a, thubuai siam sakte pawh an nei. Hetihlai hian a bik takin Aizawlah chuan nizan zantir atang khan halpuah ri leh halmawi hmuh leh hriat tur a khat tawkin a awm reng a, zanlaiah phei chuan a nasa zual a ni.

He thuziahlai hian halpuah, halmawi etc. avang hian mi engzat nge man an nih kan hre hman lo a, nikum hunpui lai khan halpuah, halmawi etc. vangin thubuai 22-ah mi 28 lakah thubuai ziahluh a ni.