Vanglaini - Tlabungah sikserh chungchang zir chiang

KHAWTHLIR

Heroin kg. 1.09 man

Mizoram Police-te chuan nimin tlai khan Zokhawthar aṭanga lo kal pick up truck MZ/01 N - 7137 aṭangin Tuikhurhluah heroin kg. 1.09 an man a, motor-a chuang Thangliana (37) s/o Bawiliana, Myanmar leh Zoliansanga (45) s/o Kaithanga, Khuangleng khuate an man. Thudawn danin, Tuikhurhlua police duty-te chuan motor hi lo tihdin an tum a, mahse an tlan tlang lui a; police-te chuan motor hi um zuiin km. 1 hnu velah an umpha a, an man ta a ni.

Centenary lawm

Venghnuai Presbyterian kohhran chuan nimin khan an hall-ah an kum 100 (Centenary) tlin lawmna atan free clinic leh thisen pek runpui an buatsaih. Free clinic-ah hian Venghnuaia doctor-te'n damlote an en a; thisen pek runpuiah hian mipa 18 leh hmeichhe pathum, an vaiin mi 21 in Aizawl Civil Hospital tan thisen unit 21 an pe. Venghnuai kohhran hian June 2 aṭang khan centenary hi an lawm ṭan a, a lawmna pui ber chu November 15, 2019 ah an buatsaih ang.

Inthlan chawlh

Mizoram sorkar chhuan thuchhuah siamin, August 30, 2019-a local council by-election neihna tur Chaltlang, Chhinga Veng leh Kanan Venga sorkar hnathawkte'n vote an thlak theihna atan inthlan ni hi heng veng pathum huam chhunga sorkar hnathawkte tan chawlh a nih thu a tarlang.

DC-in hawng

Siaha DC Bhupesh Chaudhary chuan hmeichhia harsatna tawkte tluk luhna tur, One Stop Centre atana hman lailawk tur DC office quarters pakhat chei ṭhat chu nimin khan a hawng. Siaha DC chuan One Stop Centre chu 24x7 hawn a nih tur thu a sawi.

Zirtirtu training

SCERT chuan nimin khan an auditorium-ah high school zirtirtute tan 'Training of Nodal Teachers on Drug Demand Reduction' an buatsaih a; Aizawl district-a high school zirtirtu 34 an tel. He training hi National Action Plan on Drug Demand Reduction, Ministry of Social Justice and Empowerment leh Ministry of Human Resource Development hmalaknaa neih a ni.

DAWNTISEI

Tlabungah sikserh chungchang zir chiang

Mizoram State Malaria Programme hotute chuan tunlai hian Mizorama sikserh hluarna ber pawl nia ngaih Tlabung leh a chhehvel khaw hrang hrang tlawhin, he natna kaihhnawih thil hrang hrang an zir chiang.

Mizoram State Malaria Programme consul-

tant (monitoring and evaluation) Dr Malsawmtluangi Ralte leh Dr Lalrotluanga-te hian, Thawhṭanni aṭanga nimin thleng khan, Tlabung Sub-Division huam chhunga khuate tlawhin sikserh natna chungchang bik an zir chiang a ni.

Tlabung Sub-Divisional hospital bakah khaw chhehvel - Diblibagh, Sugarbasora, Ugdasuri Tuichawng, Phairuangkai sub centre, Rotlang West, Chhumkhum leh Lungsena sub centre leh PHC-te an tlawh a ni.

Tlabung Sub-Division hi Mizorama sikserh hluarna ber pawl niin, nikum April aṭanga kumin June thleng khan sikserh vei hmuh chhuah mi 451 an awm a, an zinga mi 428-te chu Plasmodium Falciparum (PF) vei niin, a bak chu Plasmodium Vivax (PV) vei an ni.

Share this Post

Login to comment

No Comments