Khawzawlah DC pisa thar hawn a ni

Khawzawl district deputy commissioner (DC) pisa atana buatsaih thar, Khawzawl Darngawn Venga mi chu nimin khan minister of state Lalruatkima’n a hawng a; Khawzawl district DC thar H Lianzela leh SP thar PC Lalchunglura ten an ṭawiawm.

Khawzawl DC office hawn zawhah Zaingen Veng YMA Hall-ah DC thar leh SP thar inhmelhriattirna leh lawmna inkhawm neih a ni. Minister Lalruatkima chuan, deputy chief minister leh bialtu MLA Tawnluia ngenna anga kal a nih thu sawiin, Khawzawl district tihpuitlin a ni ta chu mipuite a lawmpui thu a sawi a, “He district hi kum 2008 khan a piang tawh a, kum 10 a function theih loh hnuah, tunah a pâitu ngeiin a hring ta hi a lawmawm bik a ni,” a ti.

Lalruatkima chuan, sorkarin ngun taka ngaihtuahin district thara office dah hmasak ngai, DC office leh SP office 

aṭangin bul ṭan a ni tih sawiin, “Revenue department, RD, IPR leh department suan luh hmasak ngaite pawh dah chhoh zel kan tum,” a ti a; Chief Minister kaihruaina hnuaiah theihtawp an chhuah zel dawn tih a sawi.

Minister Lalruatkima hian Khawzawl district mipui chu sorkar hmalakna hrang hrangah phûr taka ṭawiawm a, DC leh SP hmalaknate 

ṭha taka thlawp turin a chah a, “Thlei bik nei loa rorelna, mipuite’n an mamawhte inthlahrung loa an thlen theihna hmun ni se tih kan beisei a ni,” a ti. Khawzawl chu district khawpui a nih tawh avangin mipui an 

ṭan a ngai dawn tih sawiin Lalruatkima chuan, kawngpui hnaih lutuka in sa lo tur te, faina leh hriselna kawnga hmalakna ngaih pawimawh turtein a chah.

Inkhawmah hian Khawzawl bawrhsap hmasa ber H Lianzela leh superintendent of police hmasa ber PC Lalchunglura te pawhin thu an sawi a; district mipuite chu district pumpui hmasawnna tura thawhpuiah an sáwm.

Khawzawl district-ah hian khaw 28 awm tura tih a ni a; tun dinhmunah Khawzawl town area-ah in 3,000 chuang a awm meka chhàl niin, mi 14,000 vel an chêng meka chhût a ni.



Share this Post

Login to comment
No Comments