Vawk 14,000 thisen enfiah tawh

AH&Vety department-a Disease Investigation Wing (DI Wing) chuan an din tirh aṭanga nimin thleng khan vawk 14,000 thisen an enfiah tawh. Hetih lai hian, ran natna zir chian leh a enkawl dan tura hmalakna hmunpui, Epidemiological Centre cheng nuai 321 sênga din tum mek a ni.

AH&Vety department hotute sawi danin, DI Wing hian Mizorama ran natna hri a lên chángin, eng natna nge tih te, hri lêng darh zel tur vên te, hri lêng zel tur thlithlaiin ran damlo an enfiah ṭhin a, damdawi dik tak an hriat theih nan hma an la ṭhin. Laboratory hmangin an endik a, State Disease Diagnostic Laboratory an enkawl nghal bawk.

Kum 2013-a Porcine Repro-ductive Surveilance Syndrome (PRRS) a lên ṭumah khan Vety DI Wing hian vawk eng emaw zat thisen lain an endik a; kum 2015-a Goat Pox hri a lên ṭum pawhin a darh zel loh nan hmun hrang hrangah an natna hriat chhuah a nih theih nan an tlawh kual a, natna dik tak hriat chhuah tumin hma an la a ni.

DI Wing hi Foot & Mouth Disease (FMD) Control Programme atana hma latu a ni a, bawng 200 thisen (serum) lain, hri vei an awm leh awm loh an enfiah bakah, hri danna (vaccine) an pekte'n natna hrik lakah a vêng ṭha nge ṭha lo tihte an enfiah zui ṭhin.

Aizawl leh a chhehvel khaw pangaah FMD vaccine a thlawnin an lo pe tawh a, ran thisente lain, vaccine an pek aṭanga ni 25-30 inkarah an endik leh a, kum khatah vawi hnihte an endik ṭhin a ni.

DI Wing hian Bird Flu (Avian Influenza) leh Bovine Spongiform Encephalopathy (BSE) an tih hmangin hna an thawk bawk a; district hrang hrangah ran natna a awm leh awm loh endiktu bik an siam tawh. Bawng natna chi khat, Mad Cow Disease a thlenin an vil zui a, vawk pûl hri lêngah a tihreh dan tur duangtu an ni.

Vety officer, VFA leh ran vulhtute hnenah training an pek
ṭhin bakah, ran hriselna kawngah mipui hnenah awareness campaign an nei ṭhin a; India ram hmun hrang hranga project khawihtute'n collaborating centre-ah an rawn hmang bawk.

AH&Vety hotute chuan, khawvela hri léng mak tak tak chhuak thar mek zinga 70% chu ran leh mihring inkai chhâwn theih a nih thu leh, inkai chhawn theih zinga 60% chu ran aṭanga mihringin a kai theih a nih thu an sawi.