MR ennawntu committee-in Rawtna an la theh lut lo

Mizoram sorkarin sum har-satna sutkianna tura a hma-lakna chi khat, Medical Reimbursement (MR) Bill Review Committee a din chuan sorkar rawtna an la thehlut lo a, sorkarah thehlut tur an siam meka thu dawn a ni.

Vanglaini-in RTI Act hmanga sorkar hnathawkte MR bill chungchanga sorkar hmalakna a zawhna, Finance department-a State Assistant Public Information Officer (SAPIO)-in a chhan dan chuan, MR bill endik turin 'Medical Re-imbursement Review Committee' din a ni.

Committee-ah hian chairman chu Chief Secretary niin, Finance Commissioner chu member secretary a ni a; member dangte chu - Law & Judicial Secretary, Health Principal Director, FMGEW President leh Lalhmingthanga, IAS (Rtd.) leh Lalthansanga, Finance secretary hluite an ni.

Medical Re-imbursement Review Committee hmalak tawh dan zawhna chu, 'Meeting chungchangah hian Committee chuan chak takin hma a la chho a, meeting pawh ṭum nga a nei tawh. Ruahmanna a neihte hi tunah hian sorkarah thehluh tura ruahman mek a ni a, thehluh hunah a ruahmanna kimchang a hriat theih ang,' tiin an chháng.

MR bill atan hian Mizoram sorkar chuan kum 2013-14 khan cheng nuai 8,515.47 a sêng a; kum 2014-15 khan budget estimate-ah cheng nuai 7,808.66 (BE) dah a nih laiin, nuai 8,165.82 hman a ni. Kum kal mek 2015-16 ah budget estimate-ah nuai 8,060.52 dah a ni bawk.