Zaninah Milan Derby

AC Milan captain Davide Calabria chuan Milan Derby khel turin an inpeih tih a sawi, zanin dar 9:30 hian Italian club hlun leh ropui pahnih hi San Siro-ah an intawng dawn a ni.

Tun season Serie A match thum an khelh tawh chinah Milan leh Inter te hi an la chak vek, pakhat zawk chuan 100% chak record an chhawm nung thei dawn lo, an inhnehtawk a nih chuan an pahnihin point an hloh thung ang.

Calabria chuan, "Chona hautak a ni dawn - a nihna tak sawi chuan Inter Milan nen kan inkhel tur hi chu sawi pui chawp a ngai lo, a boruak a sang dawn tih chu khawvel hriatsa a ni. Player zawng zawngin hnehna chan châkin kan bei dawn.

"Kan team-ah hian player ṭha tak tak an awm, vanneih thlak takin tun hnaiah inbuatsaihna kan nei ṭhain hun thawl pawh kan ngah, chuvangin kan tunlai boruak thlir chuan tun ṭumah hian chak tura rinkai zawk kan ni," tiin an chak ngei a ring hle.

League match thum an khelh tawhah Inter hian goal an la chhuah miah lo - striker palian Olivier Giroud leh a ṭhiante tan chona hautak a ni dawn, anni hi goal riat khung tawh an nih avangin theihna an nei tih a chiang ve bawk.

Inter pawhin goal riat ve tho an khung a, striker ṭha Lautaro Martinez hoin zaninah Milan tlarhnung ṭhiah an tum ang. Inter hi mualneitu zawk an nih avangin fans an ngah zawk dawn a, mikhual team lama ṭang tur Stefano Pioli naute tan fimkhur a ngai hle ang.