District thar 3-ah mi 1,15,424 an awm Saitual district-ah mihring an tam ber

Kum 2011 chhiarpui ang chuan, district thar pathum zing­ah Saitual district-ah mihring an tam ber a, mi 50,575 awmin, mipa 25,607 leh hmeichhia 24,968 an ni a, chhungkua 10,219 an awm. Sai­tual district-ah hian khua pawh tam berin, khua 37 a awm a ni.

2011 chhiarpuiah hian Keifang, Rúlchàwm leh Ruallung-te chu Saitual town area an nih avangin mihring cheng zat a hranpaa tarlan a ni lo a, khaw hran anga ziah lan an ni lo. Saitual town chhungah chhungkua 2,457-ah mi 11,619 chêngin, mipa 5,727 leh hmeichhia 5,892 an ni.

Saitual district-a awm tur khuate zinga 13 chu Champhai district-a awm ṭhin an ni a, a bak zawng chu Aizawl district-a awm ṭhin an ni. Assembly constituency pathuma mi pawh khawm a ni a; Chalfilh biala khaw 19, Ṭawi biala khaw pariat leh Lengteng bial chhunga 13-te dah khawm a ni.

Khawzawl district-a awm tura tih khaw 28-te chu Champhai district-a mi deuh vek an ni a, Serchhip district-a khaw pakhat Vanchéngpui (Census record angin) a tel. Khawzawl district tharah hian chhungkua 7,372 an awm a, mi 36,381 chêngin, mipa 18,447 leh hmeichhia 17,934 an ni. District hming putu Khawzawl bikah chhungkua 2,306 awmin, mipa 5,616 leh hmeichhia 5,406, an vaiin mi 11,022 an chêng.

Khawzawl district-ah hian Assembly constituency palia mite pawh khawm a ni a; Khaw­zawl awmna constituency - Tuichâng bial aṭangin khaw 15, Lengteng bial leh Champhai North bial aṭangin khaw paruk ve ve leh, Hrangtúrzo bial aṭangin khaw pakhat dah a ni.

District thar zinga mihring awm tlemna ber Hnahthial dis­trict-ah chuan khua 27 a awm a, chu'ng zinga pahnih chu khaw pangngai ni lo, sub-village a ni. Khaw 27-ah hian chhungkua 5,846 awmin, mi 28,468 an chêng a, mipa 14,208 leh hmeichhia 14,260 an ni.

District headquarters Hnahthial town-ah kum 2011 chhiarpui ang chuan mi 7,187 an awm a, mipa 3,573 leh hmeichhia 3,614 an ni a; chhungkua 1,548 an awm.

Hnahthial district-a khua 27-te chu Lunglei district-a mi vek an ni a; Assembly cons­tituency pathum aṭanga dah khawm an ni. Hnahthial district-ah hian South Tuipui biala khuate an awm kim a, khaw 17 an ni a (sub-village Dèn­lung telin); Lunglei North biala khaw pasarih leh Lunglei East biala khaw pathum (sub-village Maudarh telin) an tel bawk.

District thar pathumah hian Mizorama Census notified town 23 zinga panga an awm dawn a; chu'ngte chu - Saitual district-ah Saitual, Khawzawl district-ah Khawzawl, Khawhai leh Biate, Hnahthial district-ah Hnahthial-te a ni.



Share this Post

Login to comment
No Comments