Rorel dan kalphung thlâk a ṭul - Lalduhoma

ZPM leader Lalduhoma chuan, Mizoramah roreltu party pahnihte leh chief minister inthlâk mah se, an rorel danah danglam a awm loh avangin rorel dan kalphung thlak a ṭul thu sawiin, chumi avang chuan kalphung thar an aupui tih a sawi.

Lalduhoma hian nimina Champhai Kahrawt community hall-a ZPM Champhai North Block Conference-ah thu sawiin, "Kan ramah party pahnihin ro an inrèl chhâwk char char a, ruling party hming a inthlak a, CM chair-a ṭhu an inthlak a ni mai a, rorelna kalphung erawh a inang reng a, a danglam chuang lo tih kan hmu. Kalphung thlâkthleng a ngai a, system thar kan mamawh a ni tiin sorkar kalphung thar kan aupui a ni," a ti.

Mizoramah party sorkar hlir a ding ṭhin tih sawiin Duhoma chuan, "Mipui sorkar din tumin rei tak kan bei a, kum 39 ka vahvaihpui tawh. A hrang tê têa kan beih avangin party pahnihte kan hneh thei lo a, heng party pahnih ni lo zawng hi a thei thei intél khawm ila, kan chakna hi hmun khatah i dah khawm ang tiin mipui movement party kan din. Congress ni lo, MNF ni lo sorkar din turin hmun khata kan awm a ngai a ni,” a ti a; party sorkarin khawtlang nun, kohhran leh thlarau nun thlengin a ei chhia niin a sawi.

Lalduhoma chuan, inthlan dawn apiangin kawngpui thawm ṭhat, pawl hrang hrang hnena tihpuitlin theih loh tur tiam leh semte a lâr ṭhin tih sawiin, "Ruling party-in inthlan dawna thil an sem chiam a, flag an tàr chiam chuan an tla dawn tihna a lo ni ziah," a ti.

ZPM Leader chuan, social media-ah ZPM mi anga inlantira ṭawng chapo leh chaltlai tak taka thil sawi ṭhin an awm tih sawiin, "Pathian zarah man chhuah zung zung an ni a, kan han chhui a, kan tih a lo ni ngai lo. Pawl dang tih a lo ni a, a titu nen phawrh mualphoin a awm zel," a ti a; chu'ngte chu mite lainatna an dawn phahna a nih thu a sawi.

Inkhawmah hian Champhai North biala ZPM candidate tur Ginzalal Hauzel pawhin thu a sawi a; July 15, 2023 hnu lama ZPM zawmtu mi 1,236 lawm luh an nih thu ZPM thuchhuah chuan a tarlang.