Sex live video tihchhuahah chargesheet siam turin MSCW-in police-te a beisei
Mizoram State Commission for Women (MSCW) chuan, August 3, 2023-a Instagram account pakhat aṭanga mipat hmeichhiatna hmang lai live-a tihchhuahah, hmeichhhe lang leh Instagram neitu chu mi thuhmun an nih thu leh, dan hnuaiah hrem a nih ngei theih nan chargesheet siam ngei turin Cyber Crime Police Station an chah.
MSCW hian nimin khan order a tichhuak a; hmeichhe zahawmna vawnhim zel a nih theih nan Instagram-a mipat hmeichhiatna hmang lai live-a tichhuaktu Mizo hmeichhia chu dan hnuaiah hrem a nih ngei theih nan chargesheet siam ngei turin Cyber Crime PS a chah. Order chhuah aṭanga ni 30 chhungin hmalak zuina report MSCW-a thlen turin a ti bawk.
MSCW tarlan danin, sex video chungchangah hian Mizoram DGP aṭangin hmalakna report September 8-ah an dawng a, Aizawl DC aṭangin an la dawng lo. Thil thleng chungchang chu enquiry officer, inspector H Lalchawimawia'n a chhui a, preliminary report leh accused statement kimchang MSCW-ah thil tel a ni.
Report-a a lan danin, August 3, 2023-a Instagram-a live-a mipat hmeichhiatna hmang lai tichhuaktu Mizo hmeichhe pakhat chuan ama account aṭang ngeiin live-in a tichhuak a; ruih theih thilin a tihbuai vanga chhia leh ṭha hriatna fîm hmang lo a nih thu tarlan a ni. Information Technology Act, 2000 Section 67A tlawhchhana hrem theih ngei a nih thu tarlan a ni bawk.
Instagram-a sex video live-a tihchhuah chu an ngai thutak hle tih tarlangin MSCW chuan, "Chìn zui a nih loh nan te, dan hnuaiah hrem theih a ni tih inzirtir thar nan te, thlirtute leh a bikin Mizo khawtlang nun a ṭha lo zawnga hruai thei a nih vangte leh, pawikhawihna ril tak a nih vangin social media kaltlanga mipat hmeichhiatna rawngkai thil awmte reng rengah pawi khawihtute danin a sawi anga hremna pek zel ni thei se tih hi MSCW duh dan chu a ni," a ti.
MSCW chuan, tun hnaiah mipat hmeichhiatna lama thlirtute ngaihtuahna hruai sual thei tur hmeichhe video leh thlalak social media-a hmuh tur tam ta lutuk chungchangah kohhran, khawtlang, chhungkua leh ram anga inzirtirna ṭha zawk neih a ṭul thu a tarlang a, "Thlalak sexy tak takte leh mipat hmeichhiatna lama ngaihtuahna hruai kâwi thei video siam leh thehdarhte hi dan hnuaiah hremna na tak pek theih a ni," a ti bawk.