Zirlai ti ṭhate hnenah laptop hlân

Tuipuiral Zirlai Pawl (TZP) chuan September 9, Inrinni khan Chanmari YMA Hall-ah Freshers' Social an hmang a, East Tuipui bialtu MLA Ramthanmawia'n hmanpuiin, mi pariat hnenah MLA Award - laptop a hlan.

Ramthanmawia chuan, TZP chu thawhpui nuam a tih thu a sawi a, "TZP nena kan thawh dunna a ṭhat avangin bialtu MLA ka nih hnuah zirtirtu indaih lohna nasa taka phuhrûk a ni a, sikul thawm ṭhat lamah pawh theihtawpin hma kan la a, kawng chungchang leh thil dangah pawh theihtawp chhuahin hma kan la ṭhin a ni," a ti.

Inkhawmah hian Tuipuiral huam chhunga kumin HSLC leh HSSLC examination-a distinction-a pass zirlai pariat hnenah MLA Award (laptop) hlan a ni a; Tuipuiral chhûlchhuak mi hmingṭha thlan chhuah hrang hrang - special judge (PC Act) Dr HTC Lalrinchhana, Eco Fair dintu Lalthlamuani, Commonwealth Youth Weightlifting Championship 2023-a gold medal dawngtu Lalruatfela, nungcha leh ramngaw humhalhtu VL Bela bakah, university rank holder leh doctorate degree (Ph.D) hmu tharte hnenah chawimawina hlan a ni bawk.