Naupang inkhawmpui hlim taka hman a ni

Nimin khan Presby-terian Kohhrana sunday school naupangte'n inkhawmpui an hmang a, UPC (North East India)-in sunday school inkhawmpui an hmang bawk.

Inkhawmpui hi pastor bial hrang hrangah neih a ni a, naupangte'n cháng sawi, thu inchháng leh hla hmangin Pathian thu an puang chhuak a ni. Pastor bial tam takah chuan chawhma bakah, chawhnu lamah hun an hmang a, thingtlang lam bial ṭhenkhatah chuan inkhawmpui thlennaah riak lutin, Inrinni zan aṭanga nizan thleng khan inkhawmpui an hmang.

Naupang inkhawm-puiah hian naupangte an intihsiak a, pastor bial ṭhenkhatah chuan intihsiakna anga kalpui a ni lo thung. Nimina naupang inkhawmpui nei tam zawk chu Mizoram Presbyterian Kohhran leh UPC-te an ni.

Naupang sunday school inkhawmpui hi a tirah chuan missionary-te ṭhahnemngaihna vanga neih a ni a, kum 1931-a Tlangnuam, Aizawla naupang inkhawmpui chu a hmasa ber nia hriat a ni.

Presbyterian Koh­hranah chuan tun hma lamah chuan naupang inkhawmpui hi pastor bial hrang hrangin an remchan hunah an nei ṭhin a, a hnuah Synod lamin hun inang tlanga hman turin a ruahman a, September thlaa Pathianni vawi hnih­naah neih a ni tlangpui.

Naupang inkhawm­puiah hian Beginner aṭanga Sacrament department-te an tel a, Pathianni leh Sep­tember 17-ah Senior department-te an inkhawmpui ve thung ang.

Synod Inkhawmpui 2022 report-a a lan danin, Mizoram Presbyterian Kohhranah sunday school 1,028 a awm a, Beginner aṭanga Sacrament depart­ment-ah zirlai 1,16,424 leh zirtirtu 23,854 an awm a ni.

UPC (NEI) hnuaia North Mizoram District leh Aizawl East District-te'n nimin khan bial hrang hrangah sunday school inkhawmpui an hmang a, bial ṭhenkhatin Pathianni hmasa aṭangin an hmang ṭan bawk.

UPC sunday school inkhawmpuiah hian naupangte chu Pathian thu bakah, thu inchháng, zaipawl, malzai leh reci­tation bakah an zirlaibu aṭanga quiz siam hmangin an inel a; bial ṭhenkhatah chuan inelna awm loin special item angin an kalpui. Inrinni chhun khan rorelna inkhawm neih a ni.

UPC NEI sunday school hi March 21, 1969-ah kalpui ṭan a ni a, inkhawmpui hmasa ber chu March 12, 1980 khan neih a ni.