Aizawl Sahuana ramsa panga Nandankanan Sahuanin an la

Sahuana ramsa inthleng tawnna hmangin Aizawl Zoological Park (Aizawl Sahuan)-a ramsa panga chu tun hnai khan Nandankanan Zoological Park-in an rawn la a, Aizawl Sahuanin kumin March thla khan sakei an la ve thung.

Thu dawn danin, Nandankanan Sahuan aṭangin mi paruk chu ACF Sudip Kumar panda hoin ramsa la turin Aizawlah an rawn kal a; Aizawl Sahuan aṭanga ramsa an lâkte chu hauhûk nupa, záwng hmelṭha (pig tailed macaque) nupa leh savawm nu pakhat a ni a, September 8, 2023 khan Nandankanan Zoo-ah dah luh a ni.

Nandankanan Zoological Park, Bhubaneswar aṭang hian ramsa inthleng tawnna hmangin Aizawl Zoological Park chuan kumin March thla khan sakei pahnih an la a, March 31, 2023 khan Sahuanah dah luh niin, April 11 aṭangin mipui hmuh theiha dah chhuah a ni.

Aizawl Sahuanah sakei pathum a awm mek a, March 31, 2023-a an dah thar pahnih chu Royal Bengal Tiger niin, a nu leh a pa a ni a, inthlah pung tura beisei a ni.