Anemia Mukt Bharat Strategy zirho

Nimin khan Hospital & Medical Education auditorium-ah Anemia Mukt Bharat (AMB) Strategy chungchang zirhona buatsaih a ni a, district trainer-te an tel a, National Health Mission (NHM) mission director Dr Eric Zomawia'n a hmanpui.

AMB Strategy hi NHM hnuaia pêng pakhat a ni a, sorkar laipuia Ministry of Health & Family Welfare bultumin kum 2018-ah India ram pum huapin kalpui ṭan a ni. Mizoramah chuan March 2021 khan kalpui ṭan a ni a, April 2021 khan orientation workshop hmasa ber huaihawt a nih hnuah, nimin khan reorientation workshop buatsaih leh a ni.

Zirhonaah hian Health & Family Welfare, School Education leh Women & Child Development department aṭangin AMB Strategy hnuaia mawhphurhna neite an tel a; AMB inhrilhfiah a nih bakah, Mizorama naupang, tleirawl leh nute zinga thisen tlakchham natna (anemia) neite hmuh chhuah a, enkawl leh anemia ûm bo a nih theihna tura thawhhona ṭha neih theih dan turte sawiho a ni.