Rêl kawng lei chimah mi 26 an thi : ruang hmuh tawh 18 zinga 16 hlàwm a ni tawh

Bairabi-Sairang inkara rêl kawng siam meka Sairang Kurunglui chunga lei dawh mek chu nimin zing dar 9:30 pelh khan a chim a, hna thawktu mi 26 an thia hriat a ni a, nimin tlai dar 6 thleng khan mi 18 ruang hmuh a ni tawh.

Vanduaina a thleng tih hriat a nih veleh Sairang leh Sairang Dinthar khawtlangin vanduaina thlenna hmun an pan a; Mizoram Police, Border Security Force (BSF) leh National Disaster Response Force (NDRF)-te pawh chhanchhuah hna thawk tur leh ruang zawng turin an hmanruate nen an kal nghal bawk.

Police report-a a lan danin, mitthi 26 an awm a, nimin tlai dar 6 thleng khan ruang 18 hmuh tawh niin, ruang 16 chu hlàwm a ni tawh. Ruang hmuh tawh pahnih chu thîrin a delh beh tlat avangin khâwl nen lâk chhuah tuma beih mek a ni. Mi panga hmuh an la ni lo a, uisathiamte nen zawn a ni.

Ruangte chu nimin chhun dar 12 vel aṭang khan kawngah lak chhuah ṭan a ni a, ruang dahna hmunah ambulance a kal theih loh avangin JCB hmangin ambulance awmna thleng phurh a ni. Ruangte chu Sairang Dinthar YMA Hall-ah dah an ni a, Hall-ah hian endik (postmortem) nghal an ni.

Mitthite chu West Bengal mi, mipa vek an ni a, ṭawih thei lo tura buatsaih (embalm) a nih hnuah Railways thuneitute hnenah an khuaa thawn turin hlan a ni ang.

Lei chimah hian mi pathum an hliam a, pahnih chu Sairang damdawi-inah hruai niin, ngaihtuahawm lutuk an ni lo. Mi pakhat chu lei ban chung záwlah hliam tuar chungin a awm a, Quick Response Team leh NDRF-te chu ban dang (ft. 50 vela hla) aṭanga uai pheiin, metre 100 vela sang aṭang stretcher nen an chhukpui a ni.

He thu ziah lai thleng hian Sairang leh Sairang Dinthar khawtlang mipui, Mizoram Police, BSF leh NDRF-te'n ruang zawn hna ngawrh takin an thawk mek.

Vanduaina thlenna hmunah hian nimin khan Lok Sabha MP C Lalrosanga, minister of state TJ Lalnuntluanga, MLA pahnih Zothantluanga leh K Laldawngliana, chief secretary Renu Sharma, DGP, Home secretary H Lalengmawia, Aizawl DC Nazuk Kumar, Aizawl SP Rex Zarzoliana leh official dang eng emaw zat an kal a ni.

Thu dawn danin, lei dawh lai chim ta chu ABCI Infrastructures Pvt. Ltd-in an dawh a ni a; Kurunglui chunga lei dawhnaah hian ban (pillar) eng emaw zat awmin, pillar pahnih inkar metre 70 dawh mekah metre 5 chauh dawh tur la awmah lei chu a lek kawhnain zo loin a elh liam a ni. Lei dawh lai chim chu a ban bulṭhut Kurung lui aṭanga tehin metre 115-a sang a ni.

BAIRABI-SAIRANG REL KAWNG

▶ PM Narendra Modi-a'n November 29, 2014-ah lungphûm a phûm.

▶ Rél kawng hi a lian chi (broad gauge) niin, km. 51.38-a thui a ni a, contractor hrang hrangin an thawk.

▶ Lei lian leh sang 44 leh lei tê deuh 98 a awm a, lei dawh tur sei zawng belh khawm km. 7.27 a ni.

▶ Hmun 23-a lei verh ngai verh zawh a ni tawh a, leiverh 23 sei zawng belh khawm km. 9.9 a ni.

▶ Rel chawlhhmun pali - Hortoki, Kawnpui, Mualkhang leh Sairangahte a awm dawn.

▶ Rél kawng kalna tur lei laih ngai leh rel chawlhhmun turte pawh a tam zawk zawh a ni tawh.

▶ Mimal ram lâk zinga 89% chu chinfel tawh a ni a, la chinfel loh 11% pawh chinfel thuai beisei a ni.

▶ Kum 2008-09 a sum ruahman cheng vbc. 2,384.34 a ni a, March 2020-a zawh tura ruahman a ni.

▶ Sum ruahman ennawnin, revised estimate hnuhnung ber chu cheng vbc. 5,000 a tling.

▶ Rel kawng siam nan cheng vbc. 1,234 vel hman a ni tawh.

▶ December 2023-a siam zawh hman tura beisei a ni.