Reece James a inhliam

Chelsea captain thar Reece James chu training an neih laiin a inhliam, a malpui hliam vang hian a chawlh chen tur tak la hriat loh mah se thla khat aia rei chu a chawlh a ngai dawn niin an sawi.

Blues hian Pathianni zan dar 9:00 hian Premier League khel turin West Ham an lenchilh dawn. Hammers lakah James a inlan theih dawn loh avangin Lyon aṭanga an lak thar Malo Gusto chuan a hmunruak a luah thei ang.

Mauricio Pochettino-a'n hliam vangin harsatna a tawk thei dawn niin a lang. Defender rinrawl tura ngaih Wesley Fofana chu a hliam mek a, striker thar Christopher Nkunku pawh hliam vang bawkin a chawl mek bawk.

Hliam vanga chanchin lawmawm lo an nih lai hian Moises Caicedo erawh Brighton aṭangin an la fel tawh. Ecuador midfielder hian tun kar chhoah team training a zawm tawh a, tun kar tawpa league match an khelh hunah a inlan thei tawh ang.