Barca tan chak a hun ve ta

Tun season La Liga-a an match hmasa berah Barcelona-in hnehna an chang zo lo nghal a, Getafe khelmualah goal an khung lo - hetihlai hian an elpui Real Madrid leh Atletico Madrid erawh an chak ve ve a, a tawi zawnga sawi chuan a bul ṭan aṭangin an elpui an phak lo nghal.

Pathianni zan dar 11:00-ah Barcelona hi an inlan dawn a, Cadiz an mikhual ang - Robert Ldewandowski neitu team hian goal an khung lo leh a nih ngat chuan fans lamin lungawi lohna an lantir ang tih a chiang a, Pathianni zanah chak ngei an mamawh.

Match hmasa bera goal thum khungtu Atletico Madrid pawh Pathianni zanah vek an inlan dawn a, an hamchhawn tur erawh team ṭha Real Betis an ni a, Madrid khaw club tan a hma ang ngawt chuan a awlsam tawh dawn lo.

Real Madrid chu zanin hian an inlan dawn a, Carlo Ancelotti-a enkawl team hian khualmualah Almeria an lenchilh dawn - Real hi tun hnaiah hliam vangin an talbuai a, an khel en a châkawm phah sawt lawi thung!

Barca an 'wow' lo

Barcelona fan-te tan tun season an ṭan dan meuh chu theihnghilh tlak khawpa ngainatawm loh a ni - an hmangaih êm êm Lionel Messi-a'n Paris St-Germain a chhuahsan dawn tih an hria a, lawm taka kut phar chunga lo kuangkuah tura an inpeih laiin club thuneitu lamin hma an la lo a, Inter Miami lamah a kal.

Chumi hnuah club legend tho Neymar-a'n PSG a chhuahsan dawn tih an hre leh a, Brazil captain pawh hi an hnenah a kir dawn emaw an ti hman - mahse, 'emaw' an tih lai kha a hnaih lai ber a ni a, Neymar pawhin Al Hilal lam a pansan daih.

Hei chauh a ni lo club captain Sergio Busquets leh Jordi Alba ten Messi hnungzuiin Inter Miami an pan a, Xavi-a'n duat taka a kuangkuah reng Ousmane Dembélé chuan Catalan club hmangaihna chu a tawk zo loah ngaiin PSG a pan bawk.

Heti taka an player langsarte an chân chung hian player langsar an lakluh chu Manchester City captain Ilkay Gündogan a ni mai a, German midfielder hi Athletic Bilbao defender Inigo defender Inigo Martinez nen a thlawnin an la lut.

Engtin nge ni dawn?

Barca hian nipui transfer-ah euro maktaduai 3.4 chiah an la seng a, Girona aṭanga an player hlui Oriol Romeu lakluh nan an hmang - a tawi zawnga sawi chuan Barca hian sum an la nei lo tih a chiang a, nomawi hum turin an squad a chhah tawk em, tih zawhna a awm thei.

Robert Lewandowski goal khung theihzia inhrilh nawn a ngai lo. Mahse, Polish striker hi kum 34 mi a ni ve tawh a, Bayern Munich-a a vanglai ang reng a ni thei tawh lo - zawhna chu, Lewy goal khung loh zana khung tur an nei em, tih hi a ni.

Ferran Torres hi player ṭha pangngai tak ni mah se Barca a zawm hnuah match 71 khelin, goal sarih chiah a la khung a, Raphinha hi goal khungtu ber atana neih chi a la ni lo a, kum 20 mi Ansu Fati hian Messi kalsan number 10 ha ve ngawt mah se a goal khung theihna a la chhawm tel rih lo hi a buaithlak!

Midfield-ah Gavi, Pedri, Sergi Roberto, Frenkie de Jong, Gundogan leh Romeu te an ṭha vek a, mahse, Busquets hmun ruak meuh hi chu a zau a ni - a pawimawh ta ber chu an match hnihnaah tal an chak a ni a, boruak hniam lutuk tur Barca-in an chawikan a ngai e.

Real an buai e

King Carlo nauten an match hmasa berah hnehna chang mah se, Real an talbuai - defender chhuanvawr Eder Militao chu Athletic Bilbao nen an inkhelh ṭumin a inhliam a, khup hliam a nih avangin a chawlh rei a ngai dawn.

Real hian tun dinhmunah David Alaba, Antonio Rudiger leh Nacho te chu centre back fit ṭha an neihte an ni a, tlarhnung lam an zuamawm sawt dawn tihna a ni - kum 25 mi centre back hma hian goalkeeper Thibaut Courtois chuan a khupah tho hliam a nei bawk.

Courtois hi season chanve deuhthaw a chawlh a ngaih dawn avangin Real hian Kepa Arrizabalaga chu season khat chhung an hnena loan-a khel turin an la lut a, Chelsea-in Bilbao aṭanga £71mtd-a an lei keeper hian Santiago Bernabeu-ah cham hlen a duh thu a sawi!

Bilbao lakah Real tan second choice Ukrainian goalkeeper Andriy Lunin chuan si ban a nghak a, zaninah erawh Kepa hian Real tan goal-a veng tura ngaih a ni - Madrid khaw club-in chak zawn an tum dawn e.