Minister-in Digitization of Archives a hawng

Mizoram State Archives-in sorkar document pawimawh, ram leh hnam rohlu thuziakte dahṭhatna tur 'Digitization of  Archives' an siam chu nimin khan Archives Hall-ah Art & Culture minister R Lalzirliana'n a hawng.

Art & Culture Minister chuan, Digitization of Archives chu hma lam pana ke pênna pawimawh a nih thu sawiin, "Khawvel ram changkang hmasate chu sawi loh, kan ṭhenawm state Assam pawhin an sorkar record bakah, mimalin an kawl record-te pawh an state archives-ah dah-

khawmin an digitize vek tawh. State archives dang eng emaw zatin an record-te digitize-in hma chak takin an la chho mek. Keini pawhin kan tihlawhtling thei hi a lawmawm a ni," a ti.

Mizote'n record vawn ṭhat leh ngaih pawimawh nacháng an la hre tâwk lo nia sawiin R Lalzir­liana chuan, "Heng vang hian 

ṭul loah kan buai a, keimahni thil ngei pawh kan chân phah fo. Tunlaia buaina kan tawh tam tak hi record kan vawn ṭhat tâwk loh vangah a ngaih theihin a lang," a ti a; thil pawimawhte dahṭhat loha vawn ṭhat a nih loh chuan, miin an chhuhsak thei tih a sawi.

Mizoram sorkar chuan Mizoram Public Records Act, 2011 leh Mizoram Public Records Rules, 2014 a buatsaih tawh a; chu dan chu bawhzui a, a ṭul anga hma la turin Art & Culture department ruat a ni.

Digitization of Archives hi Mizoram sorkarin Rs. 38,33,000 a pek aṭanga siam a ni a, Archives Hall building chhawng thumnaah siam a ni. Khawvel hmasawnnain a ken tel kháwl ṭha zawk hmanga thla lain, computer-ah dah luh a ni a, kum thum chhungin digitization of archive hna chu zawh hman tura ruahman a ni.



Share this Post

Login to comment
No Comments